Monday, September 3, 2012

Motorola Zoom 2 ටැබ් එක මෙන්න..


දැනට සති කීපයකට කලින් තවත් ටැබ් එකක් පාවිච්චි කරලා බලන්න මට අවස්ථාව ලැබුනා එටිසලාට් එකෙන්.. මොටොරෝලා සූම් 2 කියන ටැබ් එක තමයි ඒ.. පහලින් තියෙන්නේ ඔන්න ඒ ටැබ් එකේ පින්තූරයක් තමයි..

සැම්සුන්ග්ලාගේ ගැලැක්සි ටැබ් (Samsung Galaxy Tab) වගේ අසූස්ලාගේ ට්‍රාන්ස්ෆෝර්මර් (Asus Transformer) ටැබ් වගේ මෝටොරෝලා සමාගමේ ටැබ්ලට් පරිගණක හඳුන්වන්නේ සූම් (Xoom) කියන බ්‍රෑන්ඩ් නේම් එකෙන්..

ඉතින් මේ මට පාවිච්චි කරන්න ලැබුනු ටැබ් එක අඟල් 10.1 ප්‍රමාණයේ ටිකක් ප්‍රමාණයෙන් විශාල ටැබ් එකක්.. වෙනත් ටැබ් වලට වඩා මේකේ හැඩය පවා වෙනස් විදිහට නිර්මාණය කරලා තියෙනවා.. ටැබ් එකේ මුළු හතර ඍජුකෝණ නැතිව ටිකක් රවුම් හැඩයට හදලා තියෙන්නේ වැදිලා හැප්පිලා වෙන හීරීම් තැලීම් වලක්වා ගන්න වෙන්න ඕනේ.. මේ ටැබ් එකේ පිරිවිතර කොහොමද කියලා අපි දැන් බලමු.

දිග/පළල/ උස: 253.9 x 173.6 x 8.8 mm
අඟල් 10.1 තිරයේ ප්‍රමාණයට දිග පළල උස ගානට තියෙනවා කියන්න පුළුවන්.. ටැබ් එකේ ඝණකමත් පුළුවන් තරම් අඩු කරලා තියෙනවා උපරිමේට තලලා.. ;)


බර : 599 ග්‍රෑම්
බරත් ඉතින් ටැබ් එකේ ප්‍රමාණේ හැටියට සාධාරණයි කියන්න පුළුවන්.. 600ට එකයි අඩු) ;)


තිරය: HD-IPS LCD capacitive touchscreen, 16M colors, 800 x 1280 pixels, 10.1‘‘
මේ ටැබ් එකේ ඩිස්ප්ලේ එකනම් විශිෂ්ටයි කියන්න පුළුවන්.. රෙසලූෂන්, එච්.ඩී, කලර්ස් ඔක්කොම සුපිරි.. කෝර්නින්ග් ගොරිල්ලා ග්ලාස් එක තියෙන හින්දා තිරය සීරෙන ප්‍රමාණයත් අඩුයි.. සැම්සුන්ග් ටැබ් එක්ක සසඳලා බලද්දී මේ ඩිස්ප්ලේ එක සෑහෙන හොඳයි..

මතකය:
Internal: 16GB/32GB / RAM: 1GB / External: upto 32GB
මට ලැබුන මොඩ්ල් එක 16ජීබී වර්ෂන් එක.. රැම් එකත් ප්‍රමාණවත් ඕනෙම වැඩකට.. මෙමරි කාඩ් එකක් ඕනේ නම් දාගන්න පුළුවන් ඉනටර්නල් මෙමරි එක මදි නම්..

කැමරාව:
5Mp/ Autofocus/LED Flash
කැමරාව නම් 5 මෙගා පික්සල් එල්ඊඩී ෆ්ලෑෂ් එක්ක.. මට නම් ප්‍රමාණවත්.. ඉස්සරහා තියෙන සෙකන්ඩරි කැමරාව 1.3 මෙගා පික්සල්.. වීඩියෝ කෝල් එකක් ගන්න හොඳටම ඇති..

ඇන්ඩ්‍රොයිඩ් 3.2 හනීකෝම්බ්
ටැබ් වලටම විශේෂයෙන් ආපු ඇන්ඩ්‍රොයිඩ් හනීකෝම්බ් වර්ෂන් එක තමයි මේ ටැබ් එකේ තියෙන්නේ.. හැබැයි දැන්නම් ඇන්ඩ්‍රොයිඩ් ජෙලි බීන් වර්ෂන් එකත් මේකට එනවා කියලා තමයි ආරංචිය.. ඇමෙරිකාවේ තියෙන ටැබ් වලට දැනටමත් ජෙලි බීන් වර්ෂන් එක මෝටොරෝලා දීලා තියෙනවා.. අපේ පැත්තටත් හෙට අනිද්දට ලැබෙයි..

කෝටෙක්ස් ප්‍රොසෙසර්
Dual-core 1.2 GHz ප්‍රෙසෙසරයක් තමයි මේ ටැබ් එකේ අඩංගු වෙන්නේ.. ගේම් එහෙම ගහන්න කැමති අයට කියාපු ටැබ් එක.. මාත් ගේම් කීපයක් දාලා ගහලා බැලුවා.. සුපිරියට වැඩ..

ටිකක් විතර මිළ නම් වැඩී මේ ටැබ් එකේ.. ඒත් හැබැයි අවශ්‍යතාවයක් තියෙන අයට ලොකු ගාණක් නම් වෙන්නේ නැති වෙයි.. එටිසලාට් එකේ දැන් මේ ටැබ් එක මිළදී ගන්න තියෙනවා නොමිලේ ලැබෙන ඩේටා පැකේජ් එකක් එක්ක පහසු ගෙවීමේ ක්‍රමයට..










Friday, July 6, 2012

අළුතෙන් එන ලේට් නයිට් ඉන්ටර්නෙට් ප්ලෑන්ස්..


පහුගිය සති කීපයේදී ලංකාවේ මොබයිල් ඉන්ටනෙට් සේවා සපයන්නන් අළුත් පැකේජ් කීපයක් අඳුන්වලා දුන්නා තරඟෙට වගේ.. මේ ඔක්කොම ලේට් නයිට් එහෙමත් නැත්තම් මධ්‍යම රාත්‍රීයෙන් පස්සේ පාවිච්චි කරන්න පුළුවන් විදිහට තමයි අඳුන්වලා දුන්නේ.. ඒ රෑ 12.00ත් පාන්දර 6.00ත් අතර කාලෙට.. මේ කාල සීමාව දකිද්දී මට මතක් වෙන්නේ දැනට අවුරුදු ගාණකට කලින් අපි ඩයල්-අප් ඉන්ටර්නෙට් පාවිච්චි කරපු විදිහ..


මුලින්ම මේ ලේට් නයිට් ප්ලෑන්ස් අඳුන්වලා දුන්නේ මොබිටෙල් එකෙන්.. ඩේටා ප්ලෑන්ස් 4ක් මේ විදියට අඳුන්වලා දීලා තියෙනවා.. හැබැයි මේ ප්ලෑන්ස් ඔක්කොම අදාල වෙන්නේ මොබිටෙල් පසුගෙවුම් පැකේජ් වලට විතරයි දැනට.. පහල තියෙන ඇඩ් එකේ වැඩි විස්තර තියෙනවා මේ ගැන..

1GB ඩේටා වලට රු. 50කුත්
3GB ඩේටා වලට රු. 140කුත්
8GB ඩේටා වලට රු. 350කුත්
15GB ඩේටා වලට රු. 600ක් විදිහට තමයි අය කිරීම වෙන්නේ..




ඊළඟට මේ වගේ ලේට් නයිට් ප්ලෑන්ස් දෙකක් අඳුන්වලා දුන්නා හච් එකෙන්.. මේ පැකේජ් දෙක රුපියල් 75ක රීලෝඩ් එකකට 2GB හා රුපියල් 175කට 4GB විදිහටයි දැනට අඳුන්වලා දීලා තියෙන්නේ.. අමතර වාසියක් විදිහට 75 එකට රු.40ක ටෝක් ටයිම් එකකුත් 175 එකට රු. 100ක ටෝක් ටයිම් එකකුත් ලබා දෙනවා..





ඊළඟට ලේට් නයිට් ඩේටා ප්ලෑන්ස් තරඟෙට බහින්නේ ඩයලොග් එක කියලයි ආරංචිය.. මේ එන ජුලි 10 වෙනිදා ලේට් නයිට් ඩේටා ප්ලෑන්ස් 3ක් අඳුන්වලා දෙන්න ඩයලොග් එක බලාපොරොත්තු වෙනවා.. මොබිටෙල් සහ හච් යන දෙකටම වඩා වැඩි පහසුකම් මේ ප්ලෑන් වල තියෙන බවයි පේන්නේ.. විශේෂයෙන් දවසට රු. 100 ප්ලෑන් එක අන්ලිමිටඩ් ඉන්ටනෙට් දෙනවා.. මේ වාසිය අනික් එක ප්ලෑන් එකකවත් දැනට නැති පහසුකමක්.. ඩවුන්ලෝඩ් කරන අයට නම් නියමෙට ගැලපෙන ප්ලෑන් එක.. අනිත් ප්ලෑන්ස් දෙකත් මොබිටෙල්, හච් ප්ලෑන්ස් වලට වඩා සෑහෙන වාසි පාටයි පේන්නේ.. දැනට දැන ගන්න ලැබුනු විදිහට මේ ප්ලෑන්ස් පෙරගෙවුම් හා පසුගෙවුම් යන ඕනෑම ඩයලොග් සම්බන්ධතාවයකට ලබාගන්න පුළුවන් කියලයි ආරංචිය..




සංවර්ධනයත් එක්ක වෙනස් වන මගේ ගම..


පහුගිය සති අන්ත නිවාඩුවට මම ගෙදර ගියා මාසෙකට විතර පස්සේ.. රාජකාරී වැඩකටයුතු හා අධ්‍යාපන කටයුතු නිසා ගෙදර යන එක පහුගිය අවුරුද්දක කාලය තුල ගොඩක් අඩුවුනා.. දැන් ටික ටික අධ්‍යාපන කටයුතු ඉවර වෙමින් යන නිසා සති අන්තයේ ගෙදර යන්න අවස්ථාව ලැබෙනවා දිග නිවාඩුවක් වැටුනාම..

දැයට කිරුළත් එක්ක අපේ පැත්ත ඒ කිව්වේ අනුරාධපුරේ ගොඩක් පාරවල් හරි ඉක්මනට නවීකරණය වුනා.. විශේෂයෙන් පාදෙනිය-අනුරාධපුරය පාර.. ඒ දියණුව නිසා ඉස්සර තලාවේ (මගේ ගම) ඉඳලා විනාඩි 30ක් ගියපු ගමනට දැන් යන්නේ විනාඩි 10කටත් අඩු කාලයක් පාරේ බස් එකේ යනවා නම්.. ඉස්සර තිබුනු වලවල් ගොඩැලි කඳු ඔක්කොම කපලා දාලා පාර කාපට් කරලා ලොකු කරලා දැන් තියෙන්නේ..

නමුත් පහුගිය ඉරිදා අනුරාධපුරේ ටවුන් එකට ගිහින් එන ගමනේදී මට ලොකු දුකක් දැනුනා මේ වෙනස ගැන.. ඇත්තම කිව්වොත් මට බස් එකේදී ඇඬුනා මේ වෙනස්කම් දැකලා.. මේ දවස් වල ලොකු පෑවිල්ලක් තියෙනවා අනුරාධපුරේ පැත්තට.. ඒ පෑවිල්ලට ගොඩක් වැව් හිඳිලා හරිම දූවිල්ලයි.. ඉස්සර පාර දෙපැත්තේ තිබුනු මාර, කුඹුක්, මී වගේ රූස්ස ගස් ගොඩක් අද වෙද්දී දකින්න නෑ.. ශ්‍රාවස්තිපුරේ හන්දිය පහු කරන්න ලංවෙද්දී ලොකු වලවල් ටිකක් තිබුනා ඉස්සර.. අපි පුරුදුවෙලා හිටියා ඉක්මනට සීට් එක අල්ලගන්න මේ හරිය පහුවෙද්දී ගැස්සෙන හින්දා.. මට පුරුද්දට වගේ මේ සැරෙත් ඒක වුනා.. ඒත් එහෙම වලක් තියා කිසිම දෙයක් දැනෙන්නේ නැති ගානට පාර දැන් හදලා..



ගල්නෑව බස් එක නම් තාම පරණ විදිහමයි..

තලාවයි ශ්‍රාවස්තිපුරයි අතර ලොකු තේක්ක කැලයක් තියෙනවා.. මේ කැලේ ගොඩක් ලොකුයි.. දැන් පාර දිගටම අලි වැටක් ගහලා මේ කැලේ මායිමට.. ඉස්සර මෙහෙම වැටක් තිබුනේ නෑ.. දැන් දැන් ජනාවාස වැඩි වෙන නිසා අලින්ටත් ඉන්න කන්න බොන්න තැනක් නැතුව ගම් වදිනවා.. තව ටිකක් පහුකරන් එද්දි වනජීවි එකේ අලි පටවන ලොරියකුයි තව වාහන ටිකකුයි මොරගොඩ හරියේ නවත්තලා තියෙනවා දැක්කා.. පස්සේ තමයි දැනගත්තේ මේ ඇවිත් තියෙන්නේ මුංගුලියා කියන තනි අලියාව අල්ලන්න කියලා.. සඳුදා මේ අලියව ඇල්ලුවා කියලා පත්තරේ ටීවී එකේ පෙන්නුවා.. මොරගොඩ හරියට ලංවෙද්දී තියෙනවා තැනක් පුල්ලෙයාර් කන්ද කියලා.. හැම කෙනාම පුරුදු වෙලා හිටියා මේ කන්ද උඩ තියෙන ඝණ දෙවි රූපේ පහුවෙද්දී ඉඳන් ඉන්න තැන් වලින් නැගිටින්න.. ඒත් දැන් ඒ කන්ද කපලා පාත් කරලා.. ඝණ දෙවි පිළිමේ එතන තාම එහෙමම තිබුනත් මිනිස්සු වෙනදා වගේ බස් සීට් එකෙන් නැගිටලා ආචාර කරන්නේ නෑ දැන්.. මේවා දකිද්දි මගේ ඇස් තවත් කඳුලින් බරවුනා..

මෙයා තමයි මුංගුලියා (ඡායාරූපය: ලංකාදීප පුවත්පත)

ඉස්සර තලාවේ හන්දියේ තිබුනු ඔරලෝසු කණුව අයින් කරලා දැන්.. පරණ කඩවල් ගොඩක් කඩලා දාලා.. සමහර පොඩි ලඳු කැලෑ එළිකරලා ඉඩම් කට්ටි කරලා විකුණන්න පටන් අරගෙන.. ඉස්සර අපි තල් ගෙඩි කඩන්ඩ ගිය වත්තත් දැන් කට්ටි කරලා.. එක තල් ගහක් වත් පේන්න නෑ.. ඇස් දෙකේ කඳුලු පුරෝගෙන මම බස් එකෙන් හිමීට බැහැලා ගෙදර එන කොට තව සිද්දියක් දැක්කා.. ඒ පාර අයිනේ කලවැද්දෙක් එහෙමත් නැත්තම් වල්බාවෙක් මැරිලා ඉන්න දර්ශණය.. මේ සතා වාහනයක වැදිලා මැරිලා තියෙන්නේ කියලා පේන්න තිබුනා.. පල්ලෙහා තියෙන්නේ ඒ සතාගේ පින්තූරයක්..


කලවැද්දා හෙවත් වල්බාවා

සංවර්ධනයත් එක්ක සිද්ද වෙන මේ සිද්ධි මට දරාගන්න අමාරුයි වගේ එක පාරටම.. ගෙදර ඇවිත් මේ දේවල් මතක් කරකර ගොඩක් ඇඬුවා.. ලෝකේ වෙනස් වෙනවා.. ඒක මට වෙනස් කරන්න පුළුවන් දෙයක් නෙමෙයි කියලා හිත හදාගෙන මම අඬන එක නවත්තලා දැම්මා..

Saturday, June 23, 2012

සැම්සුන්ග් ගැලැක්සී ටැබ් 2



මේ මාසේ මුලදී එටිසලාට් ආයතනයෙන් මට අවස්ථාවක් ලැබුනා සැම්සුන්ග් ගැලැක්සී ටැබ් 2 එක සති කීපයකට පාවිච්චි කරලා බලන්න.. නියමු වැඩසටහනක් විදිහට ගැජට් ගැන ගුණ දොස් කථා කරන වැඩසටහන් මාළාවක පළමු අංගය විදිහට තමයි මේ අවස්ථාව මට ලැබුනේ..

සැම්සුන්ග් ගැලැක්සි ටැබ් කාණ්ඩයේ අළුතෙන් හඳුන්වා දෙන සැම්සුන්ග් ගැලැක්සී ටැබ් 2 එක අඟල් 7 ප්‍රමාණයේ ටැබ් එකක් තමයි මට ලැබුනේ.. මේ ටැබ් එක වර්ග දෙකකින් දැනට වෙළඳපොලේ ගන්න පුළුවන්.. ඒ 8GB, 16GB සහ 32GB විදිහට.. කලින් තිබුනු මාදිලිය එක්ක බලද්දී පහතින් තියෙන වෙනස්කම් විශේෂයෙන් හඳුනාගන්න පුළුවන්..


HSPA+ 21Mbps 850/900/1900/2100
පැරණි මාදිලියේ 7.2Mbps වෙනුවට වැඩිදියුණු කල 21Mbps අන්තර්ජාල සම්බන්ධවීමේ වේගයක් ටැබ් 2 එකට තියෙනවා..


1 GHz Dual-Core Processor
ප්‍රොසෙසර් එකත් පැරණි මාදිලියට වඩා වැඩි වේගයක් සහිත ඩුවල් කෝර් වර්ගයේ ප්‍රොසෙසරයක්..


7” WSVGA (1024x600) PLS TFT
කලින් තිබුනු TFT capacitive touchscreen එක වෙනුවට PLS LCD capacitive touchscreen එකක් මේ මාදිලියේ තියෙනවා..



Android™ 4.0
(Ice Cream Sandwich)
ඇන්ඩ්‍රොයිඩ් අළුත්ම සංස්කරණය වන අයිස්ක්‍රීම් සැන්ඩ්විච් මෙහි මෙහෙයුම් පද්ධතිය වශයෙන් භාවිතා වීමත් විශේෂයි.


Main (Rear) : 3 Megapixel Camera
Sub (Front) : VGA for Video Call

කැමරා යුගලයේ නම් කිසිම වැඩිදියුණුවක් කරලා නෑ අළුත් මාදිලියක් වුනත්..


Bluetooth technology v 3.0
USB 2.0 Host
Wi-Fi 802.11 b/g/n, Wi-Fi Direct
Accelerometer, Digital compass, Light
Proximity
ඉහත තියෙන පහසුකම් නම් කලින් මාදිලියෙත් තිබුනා.. ලොකු වෙනසක් මේ පහසුකම් වල වෙලා නෑ..


8 / 16 / 32GB User memory + 1GB (RAM)
microSD (up to 32GB)

අළුත් මාදිලියේ රැම් එක පැරණි එකට වඩා දෙගුණයක් තිබීම වැදගත්.. වැඩි ඇප්ලිකේෂන් ප්‍රමාණයක් එක විට විවෘත කරගන්න අවස්ථාව තියෙනවා මේ පහසුකම නිසා.. ඒ වගේම බාහිර මතකපතක් පාවිච්චි කරන්නත් පුළුවන් අන්තර් මතකයට අමතරව..

Size : 193.7 x 122.4 x 10.5 mm
Weight : 345g
පැරණි මාදිලියට වඩා බරත් මහතත් මේ නව මාදිලියේ අඩු වීම වැදගත්..


Standard battery, Li-ion 4,000 mAh
අළුත් මාදිලියේ බැටරියේ ආයු කාලය සෑහෙන හොඳ මට්ටමක තියෙනවා කියලා කියන්න පුළුවන්..



පොඩි අඩුපාඩු කීපයක් විදිහට පහත ඒවා මම දැක්කා..

- ඇන්ඩ්‍රොයිඩ් 4.0 වල ඇප්ස් ඉන්ටර්නල් මෙමරි එකෙන් එක්ස්ටර්නල් මෙමරි එකට අයින් කරන්න නොහැකි වීම ඒක අඩුපාඩුවක්.. නමුත් ඉන්ටර්නල් මෙමරි එක 8GB වලට වඩා තියෙන නිසා ගැටළුවක් වෙන්නේ නෑ.. ඒ වගේම ඉදිරියට ඒමට නියමිත ඇන්ඩ්‍රොයිඩ් සංස්කරණ වල මේ අඩුපාඩුව මගහරවයි බොහෝදුරට..

- ශබ්දය අඩුවැඩි කිරීමේ බොත්තම් පිහිටලා තියෙන ස්ථානය ටිකක් විතර කරදරයක් වගේ ටැබ් එක අල්ලා ගෙන ඉඳිමේදී.. ඊට ටිකක් පහලින් ටැබ් එක අල්ලන්න පුරුදු වීම අවශ්‍ය වෙනවා මේ නිසා..



වර්තමාන මිළ

දැනට එටිසලාට් ආයතනයෙන් හඳුන්වාදෙන මිළ රු. 67,000/- ක් නොමිලේ මාස 6කට ලැබෙන 2GB පැකේජයත් සමග.. පරණ මාදිලියේ මිළ සමග සන්සන්දනය කරද්දී මෙම මිළ යම්කිසි මට්ටමක සාධාරණයක් තිබෙනවා..





උදිත් නාරායන් !



පහුගිය 16 වෙනි සෙනසුරාදා හවස අහඹු සිද්ධියක් වුනා.. අපේ අක්කාට සිරස රේඩියෝ එකෙන් උදිත් නාරායන් සජීවී සංගීත ප්‍රසංගය බලන්න ටිකට් දෙකක් ඇදිලා තිබුනත් එයාට යන්න වෙන්නෙ නෑ කියලා මට කිව්වා..

මම කොහොමත් හින්දි ගීත වලට ඉස්සර ඉඳලාම ආස නිසා අක්කා කිව්වා මට ටිකට් දෙක ගන්න කියලා.. මේ ප්‍රසංගය බලන්න ටිකට් සල්ලි දීලා හරි අරගෙන යන්න උවමනාව තිබ්බත් ඒ සතියේ විභාග කීපයක් යෙදිලා තිබ්බ නිසා නොයා ඉන්න හිත හදාගෙන හිටියේ.. ඒත් ඉතින් වාසනාවක් කියලා දෙයක් තියෙනවා නම් පස්සෙන් පන්නා ගෙන හරි ඇවිත් ලැබෙනවා කියලා කතාවකුත් තියෙනවානේ.. අන්න ඒ වගේ දෙයක් තමයි මේ වුනේ.. කොහොමහරි ඉතින් ටිකට් දෙක අරගෙන මායි මගේ ඔෆිස් එකේ යාලුවයි එක්ක බලන්න ගියා මගේ බයික් රාජයාගේ උඩ නැගලා CH&FC එකට..

1990 ගණන් වල අති ජනප්‍රිය හින්දි ගායකයෝ දෙන්නෙක් හිටියා.. ඒ තමයි උදිත් නාරායන් සහ කුමාර් සානු.. දෙන්නා තරඟෙට වගේ තමයි චිත්‍රපටි වල සින්දු කිව්වේ.. මොහොමඩ් රාෆි, කිෂෝර් කුමාර්ට පස්සේ හින්දි සිනමාවට බිහිවුනු විශිෂ්ඨම හඬ යුගලක් විදිහට මේ දෙන්නා හඳුන්වන්න පුළුවන්.. මේ අතරින් උදිත් නාරායන්ගේ කටහඬ වෙනස්ම නැවුම් හඬක් විදිහට කා අතරත් අදටත් හොඳ පිළිගැනීමක් තියෙනවා.. උදිත් නාරායන්ගේ අති ජනප්‍රිය පළමු වෙනි පසුබිම් ගායනය විදිහට සටහන් වෙන්නේ කයාමත් සේ කයාමත් තක් චිත්‍රපටියෙන්.. ඒ මෙරේ හම් සෆර්, පාපා කෙහෙතේ හේ.. ගීත ගැයුනේ 1988 කාලේදී.. අමීර් ඛාන් හින්දි සිනමාවට පැමිණි මුල් කාලයත් හින්දි සිනමාවේ හැරුම් ලක්ෂයක් විදිහට සඳහන් කරන්න පුළුවන් කාල පරිච්ඡේදයක් තමයි ඒ.. පසු කාලීනව අනිල් කපූර්, සල්මන් ඛාන්, ආක්ෂේ කුමාර් වගේ නළුවන් රඟපෑ චිත්‍රපටි ජනප්‍රිය වෙන්න උදිත් නාරායන්ගේ පසුබිම් ගීත ගායනය ගොඩක් හේතු වුනා කියන්න පුළුවන්..












විශේෂයෙන් අද ශාරුක් ඛාන් ජනප්‍රියත්වයේ හිනිපෙත්තේ රැඳෙන්නට උදිත් නාරායන්ගේ මියුරු කටහඬ උපයෝගී වුනා කියලා බය නැතුව කියන්න පුළුවන්.. ඩර්, දිල්වාලේ දුල්හනියා ලේ ජායේන්ගේ, කුච් කුච් හෝතා හේ චිත්‍රපටි මේ අතරින් විශේෂයි..












ඉතින් එදා 16 වෙනිදා රැය මගේ ජිවිතේ අමතක නොවන රැයක් කියන්න පුළුවන්.. උදිත් නාරායන් නැමැති මියුරු ගායකයාගේ කටහඬ සජීවීව අහන්නට ලැබීම ලොකු වාසනාවක් මට නම්.. එදා ප්‍රසංගයේ ගයපු පලමුවෙනි ගීතය වීඩියේ කරගන්න පුළුවන් වුනා මගේ ෆෝන් එකට පින්සිද්ද වෙන්න.. ඔන්න ඒකත් තියෙනවා පහලින් බලා ගන්න..


Wednesday, June 20, 2012

පත කැමරාව..





මගේ සිංහල බ්ලොග් කෙරුවාව පහුගිය කාලේ අගලට වැටුනා නොදැනුවත්වම.. ඒ ටික කාලෙදි ජීවිතේ සිද්ධවුන මුණගැහුණ පහුකෙරුණු අතෑරපු විඳපු විඳවපු දේවල් රාසියයි.. ඒ අතරින් එක් වැදගත් දෙයක් තමයි ජීවිතේ පළමුවෙනි ඩී.එස්.එල්.ආර්. කැමරාව මිලදී ගැනීම..

2011 ජූනි මාසේ අග හරියෙදී තමයි මේ කැමරාව මම ගත්තේ.. මගේ හිතවත් මිත්‍රයෙක් පාවිච්චි කල Canon 1000D වර්ගයේ කැමරාවක් ටිකක් විතර අහම්බෙන් වගේ තමයි මට මිළදී ගන්න අවස්ථාව ලැබුනේ.. මේ කැමරාවත් එක්ක 18-55මි.මි කිට් ලෙන්ස් එකත් තව අමතරව 55-250මි.මි සූම් ලෙන්ස් එකකුත් මට ලැබුනා.. මගේ ජීවිතේ හීනයක් වගේ තිබුනු ඩී.එස්.එල්.ආර්. කැමරා සිහිනය ඉතින් කොහොම කොහොම හරි ඔහොම සැබෑ කරගන්න අවස්ථාව ලැබුනා..

දැන් මේ කැමරාව අරගෙන අවුරුද්දකටත් ලං වෙනවා.. වැඩිපුරම ජායාරූප ගත්තේ මගේ රැකියා ස්ථානයේ වැඩ කටයුතු වලට අදාල අවස්ථා කිව්වොත් හරි.. මම කිසිම කැමරාකරණ පන්තියකට හෝ කැමරාකරණය පිළිබඳ ගුරුවරයෙක් ළඟට නම් තාම ගියේ නෑ.. හැබැයි යන්න උවමනාවක් තියෙනවා තවදුරටත් ඉගෙන ගන්න..

හැබැයි මම වැඩිපුරම ඉගෙන ගත්තේ අන්තර්ජාලයේ තියෙන ඡායාරූපකරණ පාඩම් කියවලා... ඕන තරම් පාඩම් වගේම කියලා දෙන්න අයත් අන්තර්ජාලයේ වැහි වැහැලා.. තේරෙන්නෙම නැත්තම් යූටියුබ් එකට ගිහින් උනත් ඉගෙන ගන්න පුළුවන්..

මම ගත්ත ඡායාරූප ෆ්ලිකර් ගිණුමට එකතු කරලා තියෙනවා.. පහලින් ගිහින් ඔන්න බලාගන්න පුළුවන්..

Tuesday, February 14, 2012

සෝනු නිගාම් සජීවීව..




මගේ බ්ලොග් කියවන හුඟක් අය දන්නවා මම හින්දි ගීත රසිකයෙක් කියලා.. විශේෂයෙන් ශ්‍රී ලංකාවේ ජනප්‍රිය පැරණි හින්දි ගී කියන බ්ලොග් එක.. මෑත කාලයේ බිහිවුනු ඉන්දියානු ගායකයින්ගෙන් මම වඩාත් ප්‍රිය කරන ගායකයෙක් තමයි සෝනු නිගාම් කියන්නේ.. මොහොමඩ් රාෆිලා, උදිත් නාරායන්ලා, කුමාර් සානුලාට පස්සේ කොයි කා අතරෙත් ජනප්‍රිය වුනු ගායකයෙක් තමයි සෝනු නිගාම්.. මේ දක්ෂ ගායකයා මුල් කාලයේ “රාෆි කී යාදීන්“ නමින් ගීත ඇල්බම් කීපයක් කලා.. මොහොමඩ් රාෆිගේ ගීත හරිම මියුරු විදිහට සෝනු ගායනා කරලා තියෙන හැටි පහලින් අහන්න පුළුවන්..




මෑත කාලේ හින්දි නළුවෝ විදිහට හඳුන්වන්න පුළුවන් ශාරුක් ඛාන්, ආමීර් ඛාන්, සල්මන් ඛාන්, හ්රිතික් රෝෂන් වගේ අති ජනප්‍රිය නළුවන් බොහෝමයකගේ චිත්‍රපටි වල පසුබිම් ගායනය කලේ අපේ මේ කථා නායකයා.. හරිම ලයාන්විත ආදරබර මධුර කටහඬක් වගේම වෙනස් වූ ශෛලීන්ට ගීත ගායනා කිරීමේ හැකියාවක් සෝනු නිගාම්ට හිමී.. තාල්, කල් හෝ නා හෝ, කබි කුෂි කබි ගම්, වීර් සාරා, සාතියා, ෆනා, මේ හූන් නා, ඕම් ශාන්ති ඕම්, පරිනීතා, 3 ඉඩියට්ස් වැනි චිත්‍රපටිවල ගීත මේ අතරින් ගොඩක් ජනප්‍රියයි..



සෑහෙන කාලෙක ඉඳලා මම බලාගෙන හිටියා සෝනු නිගාම් සජීවීව ගායනා කරන ප්‍රසංගයක් බලන්න.. ඉතින් ඒ හීනේ මේ 18 වෙනිදා සැබෑ වෙන්නයි යන්නේ.. CH&FC ක්‍රීඩා පිටියේ හවස 6.30 ට තමයි පටන් ගන්නේ..

නොමිලේ ටිකට් ඕනේ අයට මේ ප්‍රසංගයේ ප්‍රධාන අනුග්‍රහයක් දක්වන ඩයලොග් එකෙන් පොඩි අවස්ථාවක් දීලා තියෙනවා.. පහලින් තියෙන ෆේස්බුක් පේජ් එකට ගිහින් තමන්ගේ විස්තර ඇතුලත් කරලා සබ්මිට් කරන්න.. සමහරවිට නොමිලේම ප්‍රසංගය බලන්න අවස්ථාව ලැබෙන්න පුළුවන්..



Wednesday, February 8, 2012

ලංකාවේ ඔන්ලයින් වෙළඳපොළවල්.. ibuy.lk




ඉංග්‍රීසියෙන් ලියන බ්ලොග් එකේ කප්රුක ත්‍යාග හා පාර්සල් බෙදාහැරීමේ සේවය ගැන පොඩි විමංසනයක් පසුගිය සතියේ මම ලිව්වා.. ලංකාවේ දැනට තියෙන මේ වගේ සේවාවන් තව මොනවද කියලා හොයලා බලන්නත් පොඩ්ඩක් හිතුනා..

ඒ අතරින් ඩයලොග් ආයතනයෙන් ක්‍රියාත්මක වෙන ibuy.lk සේවය විශේෂයි.. දැනට ඉතාමත් ක්‍රියාකාරී මට්ටමේ තිබීමත් මුදල් ගෙවීම පහසු වීමත් ප්‍රධාන හේතු ලෙස සඳහන් කරන්න පුළුවන්.. දැනට ලංකාවේ බොහෝ දෙනෙක් ebay වගේ පිටරට ඔන්ලයින් වෙළඳපොලවල් භාවිතා කරනවා.. නමුත් ලංකාවේ තියෙන ඔන්ලයින් වෙළඳපොලවල් හරහා ගණුදෙනු කරන්න ගොඩක් අය එක්කෝ දැනුවත් නෑ නැත්නම් බියක් තියෙනවා..

මේ බිය සැක දුරු කරන්නත් හැමෝම දැනුවත් වෙන්නත් එක්ක ibuy.lk එකේ තියෙන වාසි කීපයක් ගැනත් මේ දවස් වල තියෙන offers කීපයක් ගැනත් කියන්නම්..

1. ජංගම දුරකථනයෙන් ගෙවීමට ඇති හැකියාව
කප්රුක සේවය හා ibuy.lk අතර තියෙන ප්‍රධානතම වෙනස විදිහට ජංගම දුරකථනයෙන් අදාළ භාණ්ඩයට මුදල් ගෙවීමට ඇති හැකියාව සඳහන් කරන්න පුළුවන්. ebay, කප්රුක වැනි සේවා වල ගෙවීම කටයුතු සඳහා ක්‍රෙඩිට් කාඩ්පතක් තිබීම අනිවාර්යයි. නමුත් ibuy.lk වලදී ඕනෑම ඩයලොග් පෙරගෙවුම් හෝ පසුගෙවුම් සබඳතාවයකින් රු.5000ක් දක්වා මුදල් ගෙවීම කරන්න හැකියාව තියෙනවා.

2. විවිධාකාරයේ භාණ්ඩ හා සේවා සපයන ආයතන එකම තැනකින්
ibuy.lk හීදී විවිධ වෙළඳ ආයතන එකම තැනකට ගොනු කර තිබීම තවත් සුවිශේෂීත්වයක්. මේ නිසා එක් එක් ආයතන වල මිළ සසඳලා බලලා භාණ්ඩ මිළදී ගැනීමට පාරිභෝගිකයාට අවස්ථාව ලැබෙනවා.

3. ලබන්නාගේ දොරකඩටම භාණ්ඩ බෙදාහැරීම
අදාළ පුද්ගලයා (ලබන්නා) ලංකාවේ කොහේ සිටියත් එම පුද්ගලයාගේ ලිපිනයටම අදාළ භාණ්ඩය බාරදීම සිදුකිරීම තවත් සුවිශේෂීත්වයක්. සංසන්දනාත්මකව බැලීමේදී මේ සඳහා අය කරනු ලබන ගාස්තුත් ඉතාම සාධාරණයි.

පෙබරවාරි 14 වෙන දිනට යෙදෙන ආදරවන්තයින්ගේ දිනය එහෙමත් නැත්නම් වැලන්ටයින් දිනය මුල් කරගෙන හොඳ offers කීපයක් හඳුන්වලා දීලා තියෙනවා දැක්කා.. තමන්ගේ ආදරවන්තිය/ ආදරවන්තයා ටිකක් පුදුම කරවන විදිහේ වැඩක් කරන්න හිතෙනවා නම් පොඩි උත්සාහයක් කරලා බලන්න පුළුවන්.. අතටම ගිහින් දෙන නිසා surprise ගතියත් වැඩී.. පහල තියෙන offers ටික තමයි දැනට දැක්කේ.. තව දැනගන්න ලැබුනොත් දාන්නම්..



එකල දඹදිව ලව් ස්ටෝරි: කුස-පබා..







ඔන්න සෑහෙන සෑහෙන සෑ...හෙන කාලෙකින් බ්ලොග් පෝස්ට් එකක් ලියන්න හිතුනා.. පහුගියේ ටිකේ මගේ වාසදේසෙත් එහෙට මෙහෙට වුනා.. අන්තර්ජාලයට දෙයක් එකතු කලා නම් ඒ වැඩිපුරම කලේ ට්වීටරේට.. තව මෑතකදී ඉංග්‍රීසි භාෂාවෙන් බ්ලොග් එකක් ලියන්නත් පටන් ගත්තා..

ඉතින් පහුගිය සති අන්තේ අනුරාධපුරේ ගියපු වෙලේ ගෙදර අයත් එක්කගෙන ගියා “කුස-පබා“ බලන්න.. අනුරාධපුරේ සිනෙස්ටාර් හෝල් එකේ තමයි මේ චිත්‍රපටිය තිරගතවුනේ.. ආහ් තව කාරණයක් කියන්න අමතක වුනා.. දැන් සිනමාහල් තුනක් අනුරාධපුරේට තියෙනවා.. ඒ තමයි ඉස්සර කැලෑ විජේන්ද්‍රා කියපු හෝල් එක “නිව් විජේන්ද්‍රා“ නමිනුත් ඊ.ඒ.පී. මණ්ඩලයේ “සිනෙස්ටාර්“ හෝල් එකත් ලංකාවේ හොඳම සිනමාහල් 10ට අයිති වෙනවා කියන්න පුළුවන් වායුසමනය කල ඩීටීඑස් ශබ්ද තාක්ෂණය අඩංගු “විල්සිටි“ සිනමාහලත්..

කුස-පබා චිත්‍රපටිය මේ දවස් වල ඊ.ඒ.පී. මණ්ඩලයේ සිනමාහල් සියල්ලේම තිරගත වෙනවා.. හොඳ ප්‍රේක්ෂක ප්‍රතිචාරයකුත් තියනවා කියලයි ආරංචිය.. කොහොම වුනත් පහුගිය කාලේ බිහිවුන අබා, මහින්දාගමනය වගේ චිත්‍රපටි එක්ක සසඳලා බලද්දී සෑහෙන ප්‍රමිතියකට කුස-පබා නිෂ්පාදනය කරලා තියෙනවා කියලා බය නැතුව කියන්න පුළුවන්..

මහින්දාගමනයේ අධ්‍යක්ෂණය, නිෂ්පාදනය, තිරරචනයේ ඉඳලා අංග රචනය දක්වාම අවුල් ගොඩක් දැක්කා.. පසුතල නිර්මාණයේදී තමයි ඒ අඩුපාඩු සෑහෙන්න පෙනුනේ.. තෝරාගත් නළු නිළියන්, දෙබස් හා රංගනයෙත් පොඩි පොඩි අඩු පාඩු තිබ්බේ නැතුවම නෙමෙයි.. ඉතින් කුස-පබා එකේ තිර රචනය හා දෙබස් ඒ අතින් බලපුවාම විශිෂ්ඨයි කියන්න පුළුවන්.. අප අතරේ දැන් නැති ආචාර්ය තිස්ස අබේසේකර මහත්තයා තමයි මේ තිර රචනය කරලා තියෙන්නේ.. මහාචාර්ය සුනිල් ආරියරත්නයන් ඔහුගේ උපරිමයෙන් තමන්ගේ අධ්‍යක්ෂණ කාර්යභාර්යය මේ වගේ කථා තේමාවකට පණ දෙන්න යොදාගෙන තියෙනවා කියන්න පුළුවන්.. මොකද මේ කථාව ඉන්දියානු රාජවාංශික කථා තේමාවක් ගැන කියවෙන එකක් නිසා හැම දෙයක් ගැනම සැලකිලිමත් වෙන්න අවශ්‍යයි..

විශේෂයෙන්ම රේණුකා බාලසූරිය මේ චිත්‍රපටියේ නිෂ්පාදන කාර්යය මනාවට කරලා තියෙනවා කියන්න පුළුවන්.. ඇඳුම් නිර්මාණය හා පසුතල නිර්මාණය ඒ අතරින් සුවිශේෂයි..

පොඩි පොඩි ගොන් පාට් ටිකක් මේ චිත්‍රපටියෙත් නැතුවාම නෙමෙයි.. එත් ඉතින් මම නම් හිත හදා ගත්තා මේ සිංහල සිනමාවනේ කියලා..

මම දැක්ක හොඳම කාරණේ තමයි මේකේ එන ලව් ස්ටෝරි එක.. හින්දි සිනමාවෙවත් මේ තරම් ලස්සන ස්ටෝරි නෑ මගේ හිතේ.. පන්සිය පනස් ජාතකේම ඉස්සරහට මේ වගේ ලව් ස්ටෝරි කරයිද දන්නේ නෑ.. ඊළඟට ගහනවා නම් හොඳම එක තමයි සඳ කිඳුරු ජාතකේ.. මරු ලව් ස්ටෝරි එකක් ඒකත් මේ වගේම.. ටයිටැනික්, කුච් කුච් හෝතා හේ කැලේ.. :P

Tuesday, November 16, 2010

ග්‍රැවිටි.. අතිශයින්ම ටුයිටර්කාරයන්ටම පමණයි... (Gravity)





මාස ගණනකින් ඔන්න අළුත් ලිපියක් පළකරන්න යන්නේ.. රාජකාරී අධික වීමත්, ඊටත් වඩා බ්ලොග් ලිපි ලිවීම කම්මැලි රාජකාරියක් වීමත් හේතු කරගෙන තමයි ලිපියක් දෙකක්වත් ලියා ගන්න බැරිවුනේ.. ඒත් මගේ පැරණි හින්දි ගී බ්ලොග් එකට නම් ලිපි කීපයක් එකතු කරන්න වෙලාව කලාව ආශාව තිබුනා..

හරි.. අපි දැන් මාතෘකාවට එමු.. Twitter එක එහෙමත් නැත්තම් ක්ෂුද්‍ර බ්ලොග්කරණයේ ජනප්‍රියතම නැවතුම.. සයිබර් ජනතාවගේ Facebook වලින් මීළඟ පිම්ම.. වගේ කිව්වොත් හරි.. අද වෙන කොට Twitter කියන සමාජ ජාලය නොදන්න කෙනෙක් නෑ මම හිතන්නේ.. අකුරු 140කට කොටු කරලා තියෙන Twitter ජාලය බොහොම සරළයි.. Facebook වගේ සංකීර්ණ ගතියක් දැනෙන්නේ නෑ.. ආකර්ශනීයයි.. නිදහස උපරිමයි.. පුද්ගලිකත්වය උපරිමයි.. ප්‍රයෝජන උපරිමයි..

ඉතින් මේ Twitter එක ජංගම දුරකථනයෙන් පාවිච්චි කරද්දී අපිට පොඩි මෘදුකාංගයක් තිබු‍නොත් පහසුයි.. නොකියා වර්ගයේ ජංගම දුරකථනයක් තියෙනවා නම් වඩාත් සුදුසු ‍මෘදුකාංගය ගැන කියන්න තමයි මේ යන්නේ.. ඒ තමයි "ග්‍රැවිටි" ! අමු සිංහලෙන් කිව්වොත් "ගුරුත්වාකර්ශණය" තමයි නමේ තේරුම.. :) Twitter, Facebook, Foursquare යන සමාජ ජාල වලට සම්බන්ධ වෙන්න පහසු මෘදුකාංගයක්.. ඒත් S60 කාණ්ඩයේ S60v3, S60v5 සහ Symbian^3 කියන අනු කාණ්ඩ ය‍ටතේ තියෙන ජංගම දුරකථන එක්ක විතරයි මේ මෘදුකාංගය වැඩ කරන්නේ.. ඒ අනු කාණ්ඩ වලට අයත් වෙන දුරකථන මාදිලි දැන ගන්න ඕනේ නම් මෙතන ක්ලික් කරන්න..

මුලින් සඳහන් කරපු සමාජ ජාලා වලින් වැඩිපුරම Twitter වලට සම්බන්ධ වෙන්න තමයි Gravity වඩාත් ගැලපෙන්නේ.. පහලින් තියෙන්නේ ගත්ත Screenshots කීපයක්..



මම පාවිච්චි කරන්නේ Nokia 5800 XpressMusic වර්ගයේ ජංගම දුරකථනයක්.. Gravity 1.30 (build 6501) කියන version එක තමයි මම පාවිච්චි කරන්නේ.. දැනට තියෙන Twitter වලට සම්බන්ධ විය හැකි මෘදුකාංග වලින් හොඳම එක විදිහට බය නැතිව අනුමත කරන්න පුළුවන් Gravity !

twitter account කීපයක් එක විට විවෘත කර තබාගැනීමත්, දැකුම්කලු වීමත්, පින්තූර ක්ෂණිකව අප්ලොඩ් කිරීමට හැකිවීමත්, Foursquare භාවිතා කිරීමට හැකිවීමත්, සැහැල්ලු වීමත් මේ මෘදුකාංගයේ සුවිශේෂී අංග ලෙස සඳහන් කරන්න පුළුවන්..

දැනට මේ මෘදුකාංගය මිළදී ගතයුතු එකක් විදිහටයි තියෙන්නේ.. රුපියල් 1000/-කට අඩු මුදලකට මිළට ගන්න පුළුවන් මේ වෙබ් අඩවියෙන්.. ජැනෝලේ කියලා ජර්මන් ජාතිකයෙක් තමයි නිර්මාතෘ.. ඒ වගේම 2009 අවුරුද්දේ හොඳම දුරකථන මෘදුකාංගය විදිහට සම්මානයකුත් ලැබුනා නොකියා මගින්..

නොකියා ජංගම දුරකථනයක්, Twitter ගිණුමක්, තියෙනවා නම් පාවිච්චි කරලා බලන්න අමතක කරන්න එපා...

ප.ලි. : කැමති අයට මෙතනින් ක්‍රැක් කරපු එක බාගන්න පුළුවන්.. මොනවාහරි ප්‍රශ්ණයක් තියෙනවා නම් අහන්නත් පුළුවන්..

Monday, April 12, 2010

ප්‍රියේ නුඹම උපනූපන් ජාති හමුවේවා...




මගේ ගෙටත් උඩ ඔබේ ගෙටත් උඩ...කැලුම් දිදුලවන සරා සුපුන් සඳ...
එක වහළක් යට එකට දකින්නට...පූරුවෙ කල පින් මහිම කියන්නට...
ප්‍රියේ නුඹම උපනූපන් ජාති හමුවේවා...

කපුරු ගොඩක් සේ අළුවත් නොරැඳී... පැතූ පැතුම් පෙල දැවී ගියාවූ...
ජීවිතයට ඔබ අලුතින් එක්වී...මා ජීවත් කර සතුට ගෙනාවූ...
ප්‍රියේ නුඹම උපනූපන් ජාති හමුවේවා...

කිළිටි මගේ අත ඔබට සුදූසු නැත...එබැවින් වෙනතක බැඳුනද කම් නැත...
එනමුඳු මෙලොවේ නැවත උපන් කළ...ඒ අත් භවයෙන් එළිය දකින්නට...
ප්‍රියේ නුඹම උපනූපන් ජාති හමුවේවා...

මෙන්න මෙතනින් අහන්න පුළුවන්.. තිස්සායියාගෙන් ඉස්සුවේ.. ;)



පහුගිය ලිපියෙන් පොරොන්දු වුන විදිහට මේ ගීතය ගැන මගේ අදහස ලියන්න පොඩි නිවාඩුවක් හම්බුනා.. අපේ තිස්සායියා එයාගේ හදගීපොතේ මේ ගීතය ගැන ලිපියක් ලියලා ‍තියෙනවා කියලා දුකායියා මට කිව්වා.. ඒත් වෙනදා වගේ විදග්ග විචාරයක් නම් ලියන්න අමතක වෙලා අයියණ්ඩිට.. ;)

මේ ගීතය ගායනා කරන්නේ වික්ටර් රත්නායක මහත්තයා.. මියුරු අර්ථවත් පද රචනාව ප්‍රේමකීර්ති ද අල්විස්ගෙන්.. සංගීතය නම් කාගෙද කියලා දන්නේ නෑ.. :(

ඉතින් මට මේ ගීතය මගේ බොකු නහර පෙණහැලි අක්මා පිත්තාශ උණ්ඩුක පුච්ච කියන හැම එකටම වැදුන නිසා පොඩි පහේ රසවින්දනයක් කරන්න ඕනේ කියලා හිතුනා.. අපේ ලොකු අක්කාත් පොඩි අක්කාත් මේ ගීතයට හරි ආසයි.. ඉතින් ඒ දෙන්නාගේ විචාරත් මේකට එකතු කරගත්තා..


මම දකින විදිහට මං මේ ගීතයට කථාව ගොඩ නගන්නම්..

එක්තරා තරුණයෙක් ඉන්නවා "පැතුම්" කියලා, අවුරුදු 27-34 ත් අතර වයස් සීමාවක පසුවෙන.. මේ මනුස්සයා ජීවිතේ යම් තරමක් දුරට විනාස කරගත්ත පුද්ගලයෙක්.. හැබැයි ‍ඒ පැතුම්ගෙම වරදින්ම නෙවෙයි.. හ්ම්.. ඒක ටිකක් විතර දිග කථාවක්..

පැතුම්ට දැනට අවුරුදු 4කට 5කට විතර කලින් "කාමිනී" කියලා ගෑණු ළමයෙක් හම්බෙනවා.. පැතුම්ගේ ප්‍රථම ප්‍රේමය වෙන්නේ මේ "කාමිනී".. පැතුම්ගේ ජීවිතය කාමිනීත් එක්ක ගමන් අරඹනවා.. පැතුම්ටත් අනික් තරුණයන්ට වගේම පැතුම් කන්දරාවක් තියෙනවා.. ඒ හැම එකක්ම පුළුවන් මට්ටමින් කාමිනීත් එක්ක එකතුවෙලා ළඟාකරගන්න තමයි පැතුම්ගේ සූදානම.. කාලය ගත වෙනවා.. දින සති මාස ගණන්.. කාමිනී ගැන නොදැන ගෙන හිටපු කරුණු කාරණා පැතුම්ගේ කණට වැටෙනවා.. පැතුම්ගේ පැතුම් කන්ද ටික ටික ක්ෂය වේගෙන යන්න දැන් සූදානම.. කාමිනී කියන්නේ පිරිසිදු චරිතයක් තියෙන ගෑණු ළමයෙක් නෙමෙයි කියන එක දැන ගන්නවා.. පැතුම් එක්ක පැතුම් ගොඩ ගහන ගමන් තවත් අය එක්ක පැතුම් විඳින බව අපේ කථා නායක තරුණයට ඇස් දෙකින්ම දකින්න ලැබෙනවා.. එකින් එක සිහින බොඳ වෙන්න පටන් ගනිද්දී ජීවිතේට අරුතක් නැති වෙනවා.. මෙන්න මේ කාරණේ ගීතයේ මෙන්න මේ පද පෙළින් කියවෙනවා..

කපුරු ගොඩක් සේ අළුවත් නොරැඳී... පැතූ පැතුම් පෙල දැවී ගියාවූ...

කපුරු පෙති පුලුස්සලා දාපුවාම අළුවත් රැඳෙන්නේ නෑ.. ඒ වගේ පැතුම් පැතූ පැතුම් පෙලත් දැවී යනවා කිසිම නශ්ඨාවශේෂයක් ඉතුරු නොකරම.. සුරාවට සුදූවට ව‍ගේම සල්ලාල කමට පැතුම් ටික ටික හුරු වෙනවා.. කාමිනී ගැන තියාගෙන හිටපු බලාපොරොත්තු සුන් වෙලා මැරෙන්න බැරි කමට ජීවත් වෙනවා.. අතේ තියෙන තුට්ටු දෙක නැති වෙනකම් වියදම් කරන ජීවිතේකට හුරුවෙනවා..

මෙහෙම කාලය ගතවෙද්දී පැතුම්ට මුණ ගැහෙනවා ප්‍රාර්ථනා කියලා ගෑණු ළමයෙක්.. ආත්ම ගානක් පෙරුම් පුරාගෙන ආපු කෙනෙක් විදිහට තමයි පැතුම්ට දැනෙන්නේ.. තමන්ගේ අතීතය හංගාගෙන ප්‍රාර්ථනා එක්ක ආදර සම්බන්ධයක් ගොඩනගා ගන්න දිරියක් පැතුම්ට දැනෙනවා.. පැතුම්ගේ නරක පුරුදු මග හැරගන්නත් මේ සම්බන්ධය සෑහෙන උදව්වක්.. ආයෙත් සිහින මාළිගා හැදුවේ නැතිවුනාට රටට වැඩක් ඇති මිනිහෙක් කරවන්න ප්‍රාර්ථනාට පුළුවන් වුනා.. මෙන්න මේ කාරණා ටික මෙන්න මේ පෙළෙන් කියවෙනවා..

ජීවිතයට ඔබ අලුතින් එක්වී...මා ජීවත් කර සතුට ගෙනාවූ...

ටිකෙන් ටික කාලය ගතවෙද්දී පැතුම්ගේ පරණ පුරුදු ගැන ප්‍රාර්ථනාට දැන ගන්න ලැබෙනවා.. ප්‍රාර්ථනාට මේවා ප්‍රශ්ණ නොවුනට එයාගේ දෙමාපියන්ට මේක ලොකු ප්‍රශ්ණයක් වෙනවා.. ඒ නිසා ප්‍රාර්ථනාව වෙනත් කෙනෙකුට විවාහ කරදෙන්න දෙමව්පියෝ සූදානම් වෙද්දී පැතුම් අමාරුවෙන් හිත හදාගෙන මෙන්න මෙහෙම කියනවා..

කිළිටි මගේ අත ඔබට සුදූසු නැත...එබැවින් වෙනතක බැඳුනද කම් නැත...

නමුත් සුනු විසුනු වෙලා ගිය ජීවිතේ කැබලි ටික එකින් එක එකතු කරලා ආපහු හදාගන්න උදව් කරපු කෙල්ලව ලේසියෙන් අමතක කරන්න පුළුවන් කමක් පැතුම්ට නෑ.. මේ ආත්මයේදි ප්‍රාර්ථනාව හිමි කරගන්න බැරි වුනාට ලබන ආත්මයකදිවත් ලබාගන්න පෙරුම් පුරන්න තරම් ආදරයක් පැතුම්ගේ හිතේ පිරිලා තිබුනා..

එනමුඳු මෙලොවේ නැවත උපන් කළ...ඒ අත් භවයෙන් එළිය දකින්නට...

දුර ඉන්න ප්‍රාර්ථනාගේ ගෙට උඩිනුත් මෑත ඉන්න පැතුම්ගේ ගෙට උඩිනුත් පුර පෝයට පායන පුන්සඳ දෙන්නම එක වහලක් යට ඉඳලා එක දවසක දකින්න තරම් පූරුවේ පින් කරලා තියෙන බව කියන්නට...
ප්‍රාර්ථනා... නුඹ මගේම වෙලා ජාති ජාතීත් හමුවේවා..

මගේ ගෙටත් උඩ ඔබේ ගෙටත් උඩ...කැලුම් දිදුලවන සරා සුපුන් සඳ... එක වහළක් යට එකට දකින්නට...පූරුවෙ කල පින් මහිම කියන්නට... ප්‍රියේ නුඹම උපනූපන් ජාති හමුවේවා...


Saturday, March 13, 2010

සින්දු පවුල...




ඔන්න රජරට පුත්‍රයා කාලෙකින් තමයි සුපුරුදු බ්ලොග පැත්තේ ආවේ.. ජනවාරි 30 තමයි අවසානෙට ලිපියක් දාලා තියෙන්නේ... රාජකාරී බහුල වුන හින්දත් ඒ වැඩ වලට එහාට මෙහාට දුවන්න වුන හින්දත් තමයි ලිපියක් ලියා කියා ගන්න බැරිවුනේ.. වෙලාවක් තිබ්බත් මේ පැත්තේ එන්න හිතුනේ නෑ ඔළුව අවිවේකී වගේ හින්දා... ඊයෙයි අදයි ඔන්න ටිකක් උණ සෙම්ප්‍රතිශ්‍යාවත් හැදිලා ගිය සති දෙකේ වැඩිපුර මහන්සි වුන හින්දාද කොහෙද... ඒ වුනාට රජරට පුත්තරයාම ජයට කරගෙන යන ශ්‍රී ලංකාවේ ජනප්‍රිය පැරණි හින්දි ගී බ්ලොගේ නම් ලිපි කීපයක් දැම්මා එහෙමෙහෙ යන එන ගමන්... හින්දි සින්දු ආස ඒ පැත්තෙත් ගොඩවෙලා යන්න කියලා ඉල්ලීමකුත් කර ඔන්න...

අද මේ කාලෙකින් ලිපියක් ලියන්න හිතුනේ අපේ පොඩි අක්කා මගෙන් ඉල්ලපු සින්දුවක් හින්දා... ඇත්තම කිව්වොත් අපේ ගෙදර ඉන්නේ ඔක්කොම සින්දු පිස්සෝ.. තාත්තාගෙන් පටන් ගත්ත ලෙඩේ පවුලේ බාලයා වෙච්චි මම දක්වා බරපතල විදිහට බෝ වෙලා තියෙන්නේ.. සිංහල සින්දු, හින්දි සින්දු, දෙමළ සින්දු, ඉංග්‍රීසි සින්දු ආදී එකී මෙකී නොකී සංගීතයේ සබ්බ සකල මනාවම මේ පිස්සුවේ අන්තර්ගත වෙලා තියෙනවා.. අපේ කට්ටිය ඉතින් ට්‍රිප් එකක් කාරිය ‍ගියොත් පිය-පුතු-දියණි සුසංයෝගයෙන් නියම බජව්වක් දානවා රම්පෙට පොරි හැලෙන්ඩ.. වාහනේ ඉන්න කස්ටියම සලිත වෙලා යනවා Zසිං ගාලා... :) හ්ම් හ්ම්.. ඇති ඇති පුරාජේරුව එහෙනං.. දැං බහිමුකෝ මාතෘකාවට..

ඕං ඉතිං අපේ අක්කා ඉල්ලපු සින්දුව තමයි වික්ටර් රත්නායකගේ ඔබේ වහලෙටත් උඩින් කියලා එකක්... එයා සින්දුව ඇහුවට එයාට හරියට පද නිච්චියක් නෑ.. ඒ වුනාට සින්දුවේ තේරුම බොක්කටම වැදිලා... ඉතින් කියෝනවා කියෝනවා කොහොමහරි හොයලා දෙන්න කියලා... මමත් උපරිම මීටරේ දාලා මතක් කොලා මතක් කොලා එන්නේ නෑ.. තාත්තාට ටිකක් අඬගහලා පද ටික කිව්වා... තාත්තා සින්දුවේ මැද ටික ගායනාම කරලා පෙන්නුවා.. (අපේ අපුච්චිගේ ප්‍රියතම ගායකයා වික්ටර් රත්නායක මහත්තයා) ඔන්න දැන් මටත් ටික ටික මීටර් වේගන ආවා... අක්කටත් ඉතින් හෙන හැපි... අල්ලගත්ත මුල වචන ටික... මෙන්න මෙහෙමයි සින්දුවේ මුල

"මගේ ගෙටත් උඩ.. ඔබේ ගෙටත් උඩ..
කැළුම් දිදුලවන.. සරා සුපුන් සඳ...
එක වහලක් යට.. එක‍ට දකින්නට..
පූරුවේ කල පින්.. මහිම කියන්නට...

ප්‍රියේ නුඹ... උප නූපන් ජාති හමුවේවා..."

හැබැයි ඔය අවසාන පද පේළිය නම් ගොඩක් අයට මතක ඇති...

ටිකක් පරණ සින්දුවක් ඉන්ෆො ලංකා එකේ මියුරු ගී වලට පින්සිද්ද වෙන්න හොයා ගත්තා.. අක්කා දහ පාරක් විතර දාගෙන ඇහුවා.. ගෙදර ඔක්කොම ලැප් එක වටේ ඉඳගෙන විචාර දෙන්න පටන් ගත්තා.. අද දවසට කොහොමහරි මේ සින්දුව විසි තිස් වතාවක් විතර ඇහුවා පැල් බැඳගෙන... සමහරු නම් අහලා ඇති... සමහරු අහලා නැතුව ඇති.. :) අහන්න ඕනේ අය මෙතනින් අහන්න පුළුවන්.. අහන්න ඕනේ නැති අයට එතනින් නොඅහා ඉන්න පුළුවන්... :P

මේ සින්දුවට ලස්සන විචාරයක් වෙනම බ්ලොග් ලිපියකින් ලියන්න ඕනේ වගේ... ඒක නිසා මේ සින්දුව ඕගොල්ලෝ අහලා තම තමන්ගේ විචාර එකතු කරගන්න... කවුරුහරි ලග තියෙනවා නම් මේ ගීතයේ ඔරිම ජිනල් එක අප්ලොඩ් කරලා අපිට බාගන්න විදිහක් හදලා දෙන්න.. තිස්ස අයියාට වැඩේ පුළුවන් නම් පින්.. අපේ දුකා අයියා මේ සින්දුවට ගොඩක් ආස ඇති අනිවාර්යයෙන්ම..

එහෙනං ඕං මං අදට ගියා... මගේ උණ සෙම්ප්‍රතිශ්‍යාව හොඳ වෙන්න කියලා කස්ටියම ප්‍රාර්ථනා කරන්ඩෝ... :D

Saturday, January 30, 2010

කොඩි ගහ යට උපන්නෝ... වැව් බැඳි රට නොදන්නෝ...


මම හෙට තියෙන ඉරිදා දිවයින පත්තරේ අන්තර්ජාල පිටපත අද කියවද්දී මගේ හිතට තදට බරට වැදෙන ලිපියක් කියවන්න ලැබුනා.. ඉතින් මේ ලිපියේ තියෙන්නේ රජරට වැව් වලට සිද්ද වෙලා තියෙන ඇබැද්දිය ගැන..

රජරට කිව්වොත් ඉතින් කාටත් මතක් වෙන්නේ ඊජිප්තුවේ පිරමීඩ වගේ අපේ පුංචි රටේ තියෙන මහා විශාලම දගැබ් ගොඩයි රජරට පුරාම තියෙන වැව් කන්දරාවයිනේ... ඉතින් මේ ටිකත් ඉස්සරහට නැති වෙලා ගියොත් ලංකාවේ බලන්ඩ දෙයක් කියලා ඉතුරු වෙන්නේ බත්තරමුල්ල වෝටර්ස් ඒජ් එක වටේ තියෙන කක්කුටු වලවල් ටිකයි කොළඹ ලෝක වෙළඳ සංකීර්ණෙයි තමයි ඕං.. මේ ලිපියේ තියෙන කථාව නම් 100ට දෙසීයක්ම ඇත්ත... මේ ලිපිය ලියපු එප්පාවල ඒ කියන්නේ අපේ ගමට එහා පැත්තේ ගමේ රත්න බී. ඒකනායක මාමා අපේ පැත්තේ පරණම වැදගත් ජනමාධ්‍යවේදීයෙක්.. රජරට සේවෙත් නිවේදන කටයුතු එහෙම කලා මට මතක හැටියට..



මේ පින්තූරේ ගත්තේ අපේ ගෙදර පිටිපස්සේ තියෙන වැව ළඟදී.. ගම්බිරිගස්වැව කියල මේ වැවට කියන්නේ.. දැන් නම් මේ වැව කාලා, මේ ලිපියේ කියලා තියෙන විදිහටම...


කියවලා බලන්ඩකෝ මේ ලිපිය..


උපුටාගැනීම : දිවයින ඉරිදා සංග්‍රහය - 2010/01/31

කොඩිගහයට උපන්නෝ වැව් බැඳි රට නොදන්නෝ...

ඇමටිකක්‌ පොල් කටුවක දමාගෙන බිලීපිත්තත් රැගෙන වැව් කන්ඩියට යන මිනිසාගේ අරමුණ හා උත්සාහය වන්නේ හොද්ද බොරකර ගැනීමට මාළු දෙතුන් දෙනකු අල්ලා ගැනීමය. එසේ නැත හොත් අතමිට පුරවා ගැනීමට මාළු ටිකක්‌ විකුණා මුදලක්‌ උපයා ගැනීමය. ඉන් එහාට වැවේ පැවැත්ම ගැන හෝ ජලජ පැළෑටි බෝවීම ගැන හෝ වැව්තාවුලු අස්‌වැද්දීම ගැන හෝ ඔහුට රුදාවක්‌ නැත.

1948 වනතුරුම මෙරට කරවූ සුද්දෝ "දේශයේ ආර්ථික ආත්මය" බඳුවූ වැව් පද්ධතිය දුටු දුටු තැන විනාශ කළෝය. මහ වැව් දෙබෑවී යන පරිදි මහ වැව් මැදින් මහ පාරවල් දැම්මෝය. බ්‍රවුන්රීග් සුදු ආණ්‌ඩුකාරයා වැව්වල වැඩ කිරීම හා කට්‌ටි කැපීම රාජ දඬුවම් ලැබිය යුතු වරදක්‌ ලෙස ප්‍රකාශයට පත් කරනු ලැබීය. බ්‍රවුන්රීග් ආණ්‌ඩුකාරයාගේ සුදු නෝනා මල් පැළෑටියක මුහුණු වරින් මෙරටට ආනයනය කළ "ජපන්ජබර" ජලජ පැළෑටිය වැව්වලට බෝකොට එමගින් වැව් ගොඩවී යැමට සැලැස්‌සුවෝය. ඔවුන් මේ සියල්ල කරන ලද්දේ සිංහලයාගේ ආර්ථික කොඳු ඇටය වූ වැව් පද්ධතිය විනාශ කර දැමීමටය.

1948 සිට මේ රටේ පාලනය ස්‌වදේශිකයන් අතට පත්වුවත් කොඩිගහයට උපන් අයට වැව්බැඳි රටේ වැව් ගැන අංදෝසංසාරයක අවබෝධයක්‌ නොවීය. ඉඳහිට කලාතුරකින් එකෙකු දෙන්නෙකු සීමා මායිම් පැන ගොස්‌ වැව්ටික ගොඩ අදින්නට වෑයම් කළ අවස්‌ථා තිබිණ. නමුත් බහුතරය කළේ බිලීපිත්ත රැගෙන ගොස්‌ තමන්ගේ බඩකට පුරවා ගන්නට අතට අසුවන තරමින් මාළු ටික බාගැනීමය. අදත් වැව් බැඳි රටේ අපේ රජදරුවන් ඉදිකළ 3472 ක්‌ තරම් වූ වැව් පද්ධතිය දවසින් දවසම නටබුන් වෙමින් පවතී. දේශයේ බත සරිකර ගෙන ඇත්තේ වැව් පද්ධතියෙන් බව සුද්දන් තේරුම්ගෙන තිබූ නමුත් ස්‌වදේශීය පාලකයන්ට අඩසිය වසක්‌ ගෙවී යන තුරුත් වැව් පද්ධතියෙන් දුන් බතේ අගය තේරුම් ගැනීමට බැරි විය. නැතහොත් තේරුම් ගැනීමට වුවමනාවක්‌ ඇති නොවීය. ඊයේ පෙරේදා මේ රටේ වාරිමාර්ග අමාත්‍යාංශය බාරගත් ජීවන් කුමාරතුංග මහතා මේ රටේ විසිපන්දහසකට වඩා වැව්, අමුණු, ඇළ, දොළ ආදී ජල මූලාශ්‍ර නටබුන්ව ගොස්‌ ඇතැයි සඳහන් කළේ ඒ නිසාය.

අඩසිය වසකටත් වැඩි කාලයක්‌ ස්‌වදේශීය පාලකයන් රට කරවීමෙන් පසුවත් රටේ ජල මූලාශ්‍ර විසිපන්දහසකට වැඩි ප්‍රමාණයක්‌ නටබුන්ව ගොස්‌ ඇතැයි පාලකයන් විසින්ම කියනවිට අප මෙතෙක්‌ කල් රටට බත හදන්නට පොල් ගෑවා දැයි යන ප්‍රශ්නය නිතැතින්ම ඇති වෙයි.

අපේ රටේ ජල මූලාශ්‍රය වන්නේ අහස්‌ වැස්‌සය. විශේෂයෙන් රජරට හදන්නට නම් නැතහොත් බත් රටක්‌ කරන්නට නම් අහසින් වැටෙන වැස්‌ස පොළවෙන් පිටතට යා නොදී රැකගත යුතු යෑයි සිංහල රජදරුවන් කීවේත් කළේත් ඒ නිසාය. ලෝකෝපකාරයෙන් තොරව වැහි පොදකට පිටතට ගලා යන්නට දෙන්නට එපා යයි රටට ආදරය කළ පැරකුම්බාවන් කීවේ ඒ නිසාය. වියළි පොළවක්‌ පැතුරුණ රජරට හදන්නට නම් රජරට පුරාවට වැව් බැඳ වැව් බැඳි රටක්‌ බවට පත් කළ යුතු යෑයි ප්‍රත්‍යක්‍ෂයෙන් තේරුම්ගෙන පණ්‌ඩුකාභය රජු හාපුරා කියා අභය වැව ඉදිකරමින් ලෝකයට වාපි ශිල්පය හඳුන්වා දුන්නේ ඒ නිසාය.

රජරට බත් රටක්‌ කිරීමේ හෙවත් රජරට හැදීමේ මූලාශ්‍රය වැවයි. වැව් නොහදා රජරට හැදීමට නුපුළුවන. පැරණි රජ දරුවන් ගමක්‌ ගමක්‌ පාසා සුදුසු තැන්වල ඉහළ වැව්, කුළුවැව්, පෙරහන් වැව්, ගම්කොටු වැව්, මධ්‍ය වැව්, මහ වැව් ආදී වශයෙන් සෑම එල්ලංගාවක්‌ පාදකකොට වැව් පොකුරක්‌ නිර්මාණය කළේ ඒ නිසාය. අලුත් රජවරුන්ට අමුතුවෙන් වැව් හදන්නට රජරට ඉඩක්‌ නැත. අලුත් රජවරු කළ යුතුව ඇත්තේ අපේ පැරණි රජදරුවන් විසින් ඉදිකරන ලද සහ පසුව විදේශීය පාලකයන් විසින් විනාශ කරන ලද රජරට වැව් පද්ධතිය එකක්‌ නෑර

රැකබලා ගනිමින් පුනරුත්ථාපනය කිරීමය.

සමීපව අධ්‍යයනය කරමින් රජරට හදන්නට පත්වූ උතුරු මැද පළාත් සභාව මුලින්ම අතගැසිය යුතුව තිබුණේ වල්බිහිව නටබුන්ව විනාශ වෙමින් පැවති 3472 ක්‌ තරම් වූ රජරට වැව් පද්ධතිය සිංහල රජදා මෙන් පුනරුත්ථාපනය කිරීමටය. මේ වන විට රජරට පළාත් සභාවට වයස අවුරුදු 22 ක්‌ පිරී තිබේ. මිනිස්‌ ජීවිතයක නම් හොඳ තරුණ වයසය. නමුත් රජරට වැව් අතලොස්‌සක්‌ හැරෙන්නට තවමත් බොහෝ වැව් නටබුන්ව ගොස්‌ හෝ නටබුන් වෙමින් හෝ පවතී. අවුරුදුපතා විශේෂයෙන් මාස්‌ මෝසමට රජරටට වැටෙන මහ වැස්‌සෙන් දැනට ගොඩවී ඇති වැව් පිරී ගොස්‌ වැව් උතුරා වාන් දමා වැව්වලින් ඇළ දොළවලට ගලා ගොස්‌ වතුර ටික වැඩකට නැතිව පිටවී යයි. වෙනත් වර්ෂවලදී මෙන්ම 2009 වර්ෂයේදී ද ඒ ෙ€දවාචකය එපරිද්දෙන්ම සිදුවිය. රජරට හදන්නට බාරගත් පළාත් සභාව වාර්ෂිකව තමන්ට එකතු වන බදු මුදලින් 72% ක්‌ තරම තමන්ගේම නඩත්තුවට දියකරමින් වැව් ටික නටබුන්වී වැහි වතුර ටික පිටතට ගලා යන හැටි බලා සිටී. රජරට පළාත් සභාවේ ප්‍රධාන අමාත්‍යවරයා සඳහන් කරන පරිදි වර්ෂයකට පුනරුත්ථාපනය කරන්නේ වැව් විස්‌සකටත් වඩා අඩු ප්‍රමාණයකි. මේ විදියට වසරකට වැව් විස්‌ස බැගින් හදන්නට ගියත් වැව් 3472 ක හදා නිම කරන්නට වසර 173 ක්‌ පමණ ගතවිය හැකිය. අපේ ප්‍රධාන ආහාරය බතය. බත හදා දෙන්නේ වැවය. වැවට ඇති සැලකිල්ල මෙසේය. ඇමැති ජීවන් කුමාරතුංග මහතා සඳහන් කළාක්‌ මෙන් අපේ වැව්ටික මෙසේ අභාවයට ගොස්‌ ඇත්තේ "වැවේ අගය" පාලකයන් ඇඟට නොගැනීම නිසාය.

"වැව් හැදීම" යනුවෙන් වාරිමාර්ග දෙපාර්තමේන්තුව කරන්නේ කාර්මික හා ඉංජිනේරු නිලධාරීන් එක්‌ව වැව ඇස්‌තමේන්තු කර කොන්ත්‍රාත්කරුවන්ට බාරදීමයි. වාරි ශිල්පය හා වාපි ශිල්පය දෙකකි. අපේ වාරි ඉංජිනේරුවන් ඉගෙන ගෙන ඇත්තේ බටහිරින් ගෙනා වාරි ශිල්පයයි. වාරි ශිල්පයට වඩා දේශීය වාපි ශිල්පයේ වෙනස්‌කම් තිබේ. වැවක පෙරමුණ පහමුණ කට්‌ටකඩුව වැව්තාවුල්ල, තුරුවදුල, පෝටාවැටිය, වැව්රක්‍ෂිතය, අයියනාමුණය, මඩ සොරොව්ව, දිය සොරොව්ව, බිසෝකොටුව, දියකැටපහණ වෑබැම්ම ආදී වැවක මූලික ගුණාංග රැකෙන පරිදි ඒවා නිසි ලෙස තේරුම් ගෙන වැව අලුත්වැඩියාවට බැසිය යුතුය. මේවා ගැන අංදෝසංසාරයක්‌ නොදන්නා සමහර ඉංජිනේරුවරු කාර්මික නිලධාරිවරු, වැව් අලුත්වැඩියාවට සැලසුම් සකස්‌ කරන අතර මේවා ගැන හයහතරක්‌ නොදන්නා කොන්ත්‍රාත්කරුවෝ පටන්ගත් තැන සිට අවසාන අනුමැතිය දක්‌වා දොළපිදේනි දෙමින්, වැවට බරපතල ලෙස අසාධාරණකම් කොට මුදල් ටික ගිලගනිති. මේ මූසල ක්‍රමය පවත්නාතාක්‌ පැරණි රජ දරුවන් ඉදිකළ රජරට වැව් පද්ධතියට වර්තමාන රජ පරපුරෙන් යුක්‌තිය හා සාධාරණය ඉටුවන්නේ නැත.

වැවක ගැඹුරු අරමුණ කෙතට වතුර ගැනීම නොවේ. රජරට වියළි පොළව භූගත ජලයෙන් පිරවීමය. ධාතුසේන රජු කලාවැවේ සිට තිසාවැව දක්‌වා වැව්දිය ගෙන ඒමට ඉදිකළ ඉපැරණි යෝධ ඇළ "අඟලේබැස්‌මට" ඉදිකර ඇතැයි අද ඇතැම් අය කියන නමුත් එහි සැබෑ රහස එය නොවේ. යෝධ ඇළ, කලාවැවේ සිට තිසාවැව දක්‌වා සැතපුම් 52 ක්‌ දුර පහත් බිමෙන් උඩ බිමට ජලය ගෙන යැමේදී සැතපුමෙන් සැතපුමට "දියකලි" 52 ක්‌ පිහිටුවමින් ජලය ගලායන්නට නොව උතුරා යන්නට සලස්‌වා ඇත. එයින් සිදුවී ඇත්තේ යෝධ ඇළේ දෑල භූගත ජලයෙන් පිරී යැමය. ධාතුසේන නිම්නය ලෙස සැලකෙන යෝධ ඇළ දෑල අදත් සරුසාර කෙත්වතුවලින් පිරී පවත්නේ අපේ වාපි ශිල්පයේ මහිමය නිසාය.

සිංහල රජදරුවන් රජරට පොළව වැව්බැඳි රටක්‌ බවට පත්කිරීමෙන් බලාපොරොත්තු වූයේ වියළි පොළව භූගත ජලයෙන් පිරවීමය. එය එපරිද්දෙන්ම ඉටුවී තිබිණ. වැව් ආශ්‍රිත ගම්මානවලට නලවලින් ජලය ගෙන යැමේ අවශ්‍යතාවයක්‌ නොවීය. පොළොවේ අඩි පහක්‌ හයක්‌ ගැඹුරට හෑරූවිට වතුර පිරෙන්නට පටන්ගනී. අප ළිං ජලය ලෙස යොදා ගත්තේ මේවාය. නියං සායට වැව් පතුල හාරා බීමට හා නෑමට ජලය ලබාගත හැකි වූයේද ඒ නිසාය. මේ යථාර්ථය තවමත් අපේ අලුත් රජවරුන්ට තේරුම් ගැනීමටවත් හැකිවී නැත.

කළ යුතුව තිබුණේ නටබුන්ව ගොස්‌ තිබූ ගමේ වැව නිසි ලෙස අලුත්වැඩියා කොට වැව වැසි ජලයෙන් පුරවා දීම වුවත් දැන් කරන්නේ වැව් පද්ධතිය එපරිද්දෙන්ම නටබුන් වන්නට හැර වගා ළිං යයි හඳුන්වා දෙන විනාශකාරී ජල එකතු මගින් භූගත ජලය එක්‌තැනකට සූරාගෙන රජරට වියළි පොළව තවදුරටත් වියළීමය. මේ වගා ළිං ක්‍රමය අපට මෑතකදී හඳුන්වා දෙන ලද්දේ වතුර පොම්ප වතුර බට හා වෙනත් ජල උපකරණ ආනයනය කොට අලෙවි කරන බහුජාතික සමාගම් මගිනි. ඔවුන්ගේ ජල උපකරණ ගොවි බිමට හඳුන්වා දීමේ උපායමාර්ගයක්‌ ලෙස "වගා ළිං ක්‍රමය" රජරටට හඳුන්වාදී ඒවා කපා ගැනීමට ද බහුජාතික සමාගම් මගින් මූල්‍ය ආධාර දෙනු ලබයි. මෙහි යථාර්ථය හඳුනා ගැනීමටවත් නොහැකි වූ ඇතැම් ප්‍රාදේශීය දේශපාලන නායකයන් "ඡන්ද මෙවලමක්‌" ලෙස ගොවීන්ට වගා ළිං බෙදාදෙයි. මේ වන විට රජරට පුරාවට වගා ළිං පහළොස්‌ දහසකට වඩා කපා ඇති බව භූගත ජලය පිළිබඳ විශේෂඥයකු වූ ආචාර්ය පී. බී. ධර්මසේන මහතා අවධාරණය කරයි. මේ නිසා එක්‌ පැත්තකින් රජරට වැව් පද්ධතිය නටබුන් වී යන අතර අනෙක්‌ පැත්තෙන් පැරණි රජදරුවන් විසින් භූගත කළ ජලය වගා ළිං හරහා උකහාගෙන රජරට පොළව තවදුරටත් වියළි හා ශුෂ්ක පොළවක්‌ බවට පත් කෙරේ. මේ අමන වැඩ නිසාම රජරට "බටහිර අනුරාධපුරය" වැනි ප්‍රදේශ වහ වහා කාන්තාරීකරණයට පත් වෙමින් ඇති බව රජරට එල්ලංගා පද්ධති පිළිබඳ සුවිශේෂ අධ්‍යයනයක්‌ කළ ආචාර්ය එම්. යූ. ඒ. තෙන්නකෝන් මහතා අවධාරණය කරයි.

"ගමේ වැව" රජයේ සහ වාරිමාර්ග දෙපාර්තමේන්තුවේ වැවක්‌ බවට පත්වූයේ සුද්දන්ගේ පාලනයේදීය. ඔවුන් "ගමේ වැව" රජයේ දේපොළක්‌ ලෙස බදාගෙන වැවත් වැව් ගම්මාන සංස්‌කෘතියත් මුළුමණින් විනාශ කර දමන ලදී. අපට නිදහස ලැබුණා. හැබෑනම් විශේෂයෙන් රජරටට නිදහස ලැබුණා හැබැනම් වැව් බැඳි රටේ සමස්‌ත වැව් පද්ධතියම රජයේ ග්‍රහණයෙන් මිදිය යුතුය. "වැව" ගමේ සම්පත වුවත් පෙර රජදරුවන් ගමට වැවක්‌ ඉදිකරදී වැව් ගම්මාන සංස්‌කෘතියක්‌ ඇති කළා වුවත් අද ඇතැම් දේශපාලකයන් වාරි නිලධාරීන් හා කොන්ත්‍රාත්කරුවන් එක්‌වී කරගෙන යන්නේ වැව් අලුත්වැඩියා කිරීමේ මුවාවෙන් තම තමන්ගේ මළු පුරවා ගැනීමය. වැව ඉලක්‌ක කොට සකස්‌ කෙරෙන කොන්ත්‍රාත්තුවේ මුදලින් වැඩිමනාව තම තමන්ගේ සාක්‌කුවට පුරවා ගන්නවා හැරෙන්නට ගමේ පැවැත්ම ගැන හෝ වැවේ පැවැත්ම ගැන ඔවුන්ට කිසිදු රුදාවක්‌ නැත. කොන්ත්‍රාත්කරුවන් විසින් රුපියල් තිස්‌හතළිස්‌ ලක්‍ෂවලට කොන්ත්‍රාත් ගෙන අලුත්වැඩියා කරන වැව් අවුරුදු දෙක තුනක්‌ ගතවෙද්දී තිබුණාටත් වඩා නරක අන්දමින් වල්බිහිවී විනාශවී යන්නේ ඒ නිසාය. මෙයින් වසර තුන හතරකට පෙර රුපියල් හතළිස්‌ ලක්‍ෂය බැගින් වැය කොට අලුත්වැඩියා කරන ලද එළිය දිවුල්වැව, කන්ඩක්‌කුලම, කඳුරුගස්‌වැව, හුරීගස්‌වැව, එප්පාවල, ඉපලෝගම ආදී වැව් රාශියක්‌ අද වන විට තිබුණාටත් වඩා වල්බිහිවී විනාශවී ගොස්‌ තිබේ.

මහවැලි ජලය ගෙන ඒමේ මුවාවෙන් මහවැලි වැව් කලාපය තුළ පිහිටි ඉපැරණි යාය වැව් අසූහතරක්‌ එවකට සිටි මහවැලි බලධාරීන් විසින් විදේශීය ඉංජිනේරුවරුන්ගේ උපදෙස්‌ පරිදි පොළවට සමතලා කර දමා ඇත. කලාවැවේ සිට එප්පාවල දක්‌වා යෝධ ඇළ දෑලේ තිබූ යාය වැව් 84 ක්‌ මේ අන්දමට කපා පොළවට සමතලා කොට කුඹුරු අස්‌වද්දා ඇති අතර එච්. කලාපය තුළ පිහිටි තවත් යාය වැව් 125 ක්‌ තරම් අද වන තුරුත් වල්බිහිවී විනාශ වන්නට හැර තිබේ. කලාපීය වැව් කැපීමට එරෙහිව එප්පාවල ගොවි ජනතාව නැගී සිටීම නිසා වැව් කැපීම නවත්වන ලද නමුත් මහවැලි සැලැස්‌මේ සැලසුම්ගතව පැවති පරිදි කලාපීය යාය වැව් නොසලකා වල්බිහිවන්නට හැරීමේ ප්‍රතිපත්තිය අදටත් ක්‍රියාත්මකව පවතී.

වැව්බැඳි රටේ වැව් පද්ධතිය මෙසේ නටබුන් වී විනාශ වන්නට හැර තවත් පැත්තකින් පැරණි මහ වැව් අසූවක වැව් බැමි ශක්‌තිමත් කරන්නට රුපියල් මිලියන 7625 ක්‌ පොලී රහිත ණයක්‌ ලෙස ලෝක බැංකුව මගින් මේ වනවිටත් මේ සඳහා ස්‌ථාපිත කර ඇති "වේලි ආරක්‍ෂණ හා ජල සම්පත් සැලසුම්කරණ කමිටුවට" ලබාදී ඇත. මේ ණය මුදල යොදවා වැව් බැමි ශක්‌තිමත් කරන්නට තෝරාගෙන වැව් අතර රජරටට අයත් කලාවැව, නාච්චදූව, කවුඩුල්ල, මාදුරුඔය, නුවරවැව, මින්නේරිය, පරාක්‍රමසමුද්‍රය, නාලන්ද, කොත්මලේ, රාජාංගණය, කන්තලේ, රන්දෙණිගල, බෝවතැන්න, ගිරිතලේ, දඹුලුඔය, පොල්ගොල්ල, තිසාවැව, හුරුළුවැව, කන්ඩලම, රන්ටැඹේ, උස්‌ගලසියඹලන්ගමුව යන දැවැන්ත ජලාශ විසිඑකද පවතී. වසර දෙදහසකට වඩා වැඩි කලක්‌ නිරුපද්ද්‍රිතව පැවැති දේශීය වාපි ශිල්පයට අනුව ඉදිකරන ලද මේ ඓතිහාසික වැව් බැමි බටහිර වාරි ශිල්පයට අනුව යළි හාරා අවුස්‌සා ඉඳුල් කර දැමිය යුතු දැයි අපේ දේශීය වගකිවයුත්තන්ට නොපෙනෙන්නේ විදේශවලින් ලැබෙන ඩොලර් මිලියන 7625 ට කෑදරවීම නිසා දැයි විමසිය යුතුව ඇත. සැබැවින්ම අද අපේ රටේ වැව් පද්ධතියට අවශ්‍යව ඇත්තේ වැව් බැමි ශක්‌තිමත් දැයි කිරා බැලීම නොව රොන් මඩවලින් හා ජලජ පැළෑටිවලින්, පිරීගොස්‌ ගොඩවී වල්බිහිවී විනාශවී ඇති වැව් පද්ධතිය ඵලදායක ලෙස ප්‍රතිනිර්මාණය කර ගැනීමය.

වෙල ලස්‌සනයි තුන්හීවිට හාන කොට
ගේ ලස්‌සනයි වැසි වස්‌සන් අඬන කොට
පත ලස්‌සනයි මීදීකිරි බෙදන කොට
වැව ලස්‌සනයි නිල් මානෙල් පිපෙන කොට

"වැව" රජයේ දේපොළක්‌ නොවේ. එය අයිති ගමටය. ඒ අපේ සංස්‌කෘතියයි. වැව ගමට බාරදිය යුතුය. වැව අලුත්වැඩියා කිරීම නඩත්තු කිරිම හා රැකබලා ගැනීම පෙරදා මෙන් වැවෙන් ජලය ගෙන කුඹුරු වැඩ කරගන්නා ගොවීන්ට පැවරිය යුතුය. බ්‍රවුන්රීග් විසින් "වැව්වල කට්‌ටි කැපීම" තහනම් කරමින් පැනවූ මුස්‌පේන්තු නීතිය අවලංගු කොට වැව සහ වැවේ සියලු උපාංග රැකබලා ගැනීමේ වගකීම වැව් ගම්මානයට පැවරිය යුතුය. අපේ උරුමයක්‌ වූ වැව් ගම්මාන සංස්‌කෘතිය යළි අවදි කළ යුතුය. වැව ගමට බාර දෙන්න. රජයේ මුදල් ටික ඉතුරු වේවි. වැව ගමට බාරදෙන්න. ගමේ අය වැව රැකබලා ගනීවි. වැව ගමට බාරදෙන්න. ගමට ඇතිවන්නට බත හදාගනීවි. සශ්‍රීකත්වය එයයි. ස්‌වයං පෝෂණය එයයි. ලිපිය අවසන් කරන්නට "අපේකම" ගැන මහත් ආඩම්බරයක්‌ දැනෙන වැව් සංස්‌කෘතියේ කවියක්‌ මෙහි සටහන් කරමි.

එප්පාවල - රත්න බී. ඒකනායක



Monday, January 18, 2010

මාස්ටර් සර්... (SF Version)


http://img689.imageshack.us/img689/6233/election2010.jpg

මට අද ටිකක් දුක හිතුන දවසක්.. ඒකට හේතුව මේ දවස් වල තියෙන මැතිවරණ ප්‍රචණ්ඩ ක්‍රියා... මේවා යන එන හැම‍තැනම අහන්න දකින්න තියෙන සාමාන්‍ය දෙයක් වෙලා.. අදත් මඩකලපුවේ ගිහින් ආවා විතරයි, මෙන්න බොලේ අක්කරෛපත්තුවේ දෙපක්ෂයේ කට්ටිය ගහගෙනලු.. ඒ අස්සේ පිල්ලෙයාන්ගේ පිස්තෝලෙත් පත්තු වෙලාලු.. මාරයි ඈ.. ඒ මදිවට පුත්තලමේ මදුරන්කුලියේ චන්ද ෆයිට් එකක් ගිහින් ඔන්න තවත් බිල්ලක් අරංලු.. තවත් මදිවට අපේ ගම් පැත්තේ යූඇන්පියෙයි සාන්ධානෙයි දෙගොල්ලෝ ගහගෙනලු.. මට අනේ අපොයි ගෑවුනා නිකම්ම... ආයෙත් අර ඉස්සර චන්ද ක්‍රමේ එන්ඩද හදන්නේ කියලත් හිතෙනවා.. අර ඇඳිරි නීති සංස්කෘති ක්‍රමේ.. කට්ටියට මතකද දන්නේ නෑ.. මං නම් පොඩි කාලේ හරි ආසයි ඇඳිරි නීතිය දානවට.. මොකද දවසම ඊට පස්සේ ටීවී එකේ එක එක බයිස්කෝප් නන්ස්ටොප් පෙන්නනවා නොවැ.. :) රේඩියෝ එකේ ටීවී එකේ ඇඳිරි නීතිය දාන වෙලාව කියනකං බලං ඉන්නේ.. පොඩි කාලේ තේරෙන්නේ නෑනේ ඉතින්..

හා ඒ කථාව ඇති අපි දැන් මාතෘකාවට එමුකෝ.. අද මං මඩකලපුවේ ඉඳලා එන ගමන් "මාස්ටර් සර්" ගීතයේ භාතිය සංතුෂ්ලාගේ නව රිද්මයේ පිටපත අළුත් අයිපොඩ් එකෙන් අහඅහා ආවා.. (අයිපොඩ් එක ගැන බ්ලොග් එකක් වෙනම ලියන්නම් හොඳේ?) එතකොට ඉතින් වටේ පිටේ තියෙන චන්ද පෝස්ටර් කෑලිත් දැක්කා... මට ඉතින් මතක් වුනේ සරත් ෆොන්සේකා මහත්තයාව.. කොහොම හිටපු මනුස්සයෙක්ද ඈ ?? මේ සින්දුව නම් නියමෙට ගැලපෙනවා සරත් මහත්තයා 26 වෙනිදා දිනුවත් පැරදුනත්... මට පුදුමේ කාටවත් මේක මතක් නොවිච්ච එක... මේ සින්දුවේ ලස්සනම කෑල්ල තමයි ඔන්න ඔය පල්ලෙහායින් තියෙන්නේ...

"අප අතරේ කඹ ඇදිල්ලේ තරඟේ මේ..
නිම වෙන්නට කල් ගත වෙයිදෝ ??
අනේ සර් අපි මිතුරන් වෙයි‍දෝ ??
එදා දවස උදා වේවිදෝ ?? "

ඇත්තටම මේ දෙන්න‍ගේ තියෙන්නේ ක‍ඹ ඇදිල්ලේ තරඟයක් නෙමෙයිද? මේ හොඳට හිටිය මිනිහගේ ඔළුවට අර හිකනල්ලු ටිකක් විෂබීජ දාලා නරක් කරා නොවැ... මේ තරඟෙ නිම වෙන්නට තව තියෙන්නේ නං දවස් 08යි... ඒත් මේ දෙන්නා ආයෙත් මිතුරෝ වෙයිද ?? ඒත් ඒ දවස කවදා උදා වෙයිද ???

අන්න ඒ දවස එනකම් තමයි අපිත් ඔන්න බලාගෙන ඉන්නේ... සමහර විට එදාට තමයි රට ආයෙත් එකමුතු වුනා කියලා කියන්න පුළුවන් වෙන්නේ...



ප.ලි : මේ බ්ලොග් ලිපිය ලියූ මා මහින්ද රාජපක්ෂ මහා රාජෝත්තමයාන්නට හෝ හිටපු ජෙනරාල් සරත් ෆොන්සේකා මහත්තයාට (මල්ලක් හෝ ගෝනියක් රැගෙන) කඩේ යන්නෙක් නොවන බව කරුණාවෙන් සළකන්න...

Sunday, January 3, 2010

අළුත් අවුරුද්දයි.. අළුත් ලැප්ටොප් එකයි.. අළුත් කැමරාවයි..


අළුත් අවුරුද්දක්... අළුත් ලැප්ටොප් එකක්... අළුත් මෙහෙයුම් පද්ධතියක්... අළුත් ඩිජිටල් කැමරාවක්.. එක්ක අළුත් වුන පරණ මං..



මඩකලපුවට ගිහිං ඇවිත් දවසකට පස්සේ ඔන්න මං කොළොම්පුරයට ආවා බඩු වගයක් ගන්න.. බඩු කිව්වේ ලැප්ටොප් එකකුයි ඩිජිටල් කැමරාවකුයි ගන්න.. මගේ පුද්ගලික වියදමට නෙමෙයි, ඔෆිස් එකේ වැඩකටයුතු වලට ඔෆිස් එකේ වියදමට.. ඒ වුනාට මගේ රාජකාරී වැඩ වලට පාවිච්චියට තමයි මේක ගත්තේ.. මගේ පරණ පුද්ගලික ලැප රාජකාරී වැඩම කරලා ලෙඩ වුනා.. ඒත් ඒක කොහොම කොහම හරි හදා ගත්තා.. ඒකේ කතන්දරේ වෙනම ලිපියක් ලියන්න වටින කථාවක්.. පස්සේ දාන්නම්..

ඔන්න මං සති ගානක් බලලා බලලා හිත ගියේ ඒසර් ලැප්ටොප් එකකට... ගානත් පහසුයි... අවශ්‍ය සියළුම අංගෝපාංග වලින් පරිපූර්ණ වෙලා තියෙන හින්දා දුක නැතුව ගත්තා.. මේ ලැප්ටොප් එකේ විස්තර මෙන්න මෙහෙමයි..



Acer Aspire 5738

Intel Core 2 Duo 2.2Ghz
Intel GMA 4500MHD VGA
15.6" HD LCD
2GB RAM
320 GB HDD
DVD Super Multi DL Drive
802.11b/g/n wireless
Crystal Eye Webcam
Bluetooth 2.1+EDR
Fingerprint reader
Card Reader
4 USB Ports

මේ ලැප් එකට රුපියල් 89,900ක් වුනා.. මෙට්‍රෝපොලිටන් එකෙන් තමයි ගත්තේ.. අවුරුද්දක ජාත්‍යාන්තර වගකීමක් තියෙනවා.. නොමිලේ Kaspersky Internet Security 2010 හම්බුනා... වෙනමම තමයි මෙහෙයුම් පද්ධතිය ගත්තේ... හැමදාම හොර ඒවා දාන හින්දා මේ පාර නියම ජෙනුයින් වින්ඩෝස් 7 හෝම් ප්‍රීමියම් ගත්තා... ඒක ගත්තේ බාක්ලේස් එකෙන් රු. 13,300කට.. මේකේ 32බිටු පිටපතයි 64බිටු පිටපතයි දෙකේම ඩීවීඩී තියෙනවා... මේ ගත්ත ලැප් එකේ රැම් එක ටිකක් මදි හින්දා මං දැම්මේ 32බිටු එක.. පස්සේ දවසක රැම් වැඩි කරලා එහෙම 64 බිටු දාලා බලනවා...






ඩිජිටල් කැමරාවකුත් ගත්තා.. සෝනි සයිබර්ෂොට් W180 කියන කැමරාව තමයි ගත්තේ... 10.1 Mega Pixel තියෙන මේ කැමරාවේ 3X optical zoom තියෙනවා.. පොඩි පොඩි වැඩ වලට කියාපු කැමරාව.. රු.22,000ක් වගේ අඩු මුදලකට ගන්න පුළුවන් වොරන්ටි නැතුව... Face Detection, Smile Shutter, steadyshot වගේ පහසුකමුත් තියෙනවා.. ඔන්න පල්ලෙහා තියෙනවා ඒ කැමරා මාදිලියේ පින්තූර දෙකකුත්...



Saturday, January 2, 2010

මඩකලපුවට ගිය දෙවනි ගමන...


ඔන්න ඉතින් මුලින්ම සියළුම සිංහල බ්ලොග්කරුවන් ඇතුළු රජරට පුත්‍රයාගේ බ්ලොග කියවන සියළු දෙනාට සුභම සුභ අළුත් අවුරුද්දක් වෙන්න කියලා ප්‍රාර්ථනා කරනවා..

මේ අවුරුද්දේ ලියන පළමුවෙනි බ්ලොග් ලිපිය තමයි මේ.. කියන්න දේවල් නම් ගොඩායි.. පහුගිය දවස් වල සෑහෙන දේවල් ගොඩක් නම් කලා.. ඒ ගමන් මඩකලපුව පැත්තට ජයග්‍රාහී දෙවන වතාවටත් යන්න අවස්ථාවත් ලැබුනා... (පළමු ගමනේ ලිපිය) ඒ වගේම රාජකාරී වැඩ වලට ඉස්සරහට දිගටම ඒ පැත්තේ කරක් ගහන්නත් වෙනවා... අපේ මධුරංග අයියත් ඒ පැත්තේ ඒ දවස් වල ගියා කියලත් ආරංචි වුනා.. ඒත් එතකොට පරක්කු වැඩි.. කොහොමහරි අපි දෙන්නට මේ පාරත් මුණගැහෙන්න බැරි වුනා..


26 වෙනිදා පොලොන්නරුව මාමිණියා වැව ළගින් යද්දී...


හ්ම්.. හරි.. එහෙනං මුලක ඉඳලා පටන් ගමුකෝ... මඩකලපුවේ දවස් තුනක රාජකාරී ගමනකට ගියේ.. ආහ් කවුරුවත් දන්නවද "මොණරතැන්න" කොහෙද තියෙන්නේ කියලා? ඔය කට්ටිය කථාවට කියන්නේ අපි නොදන්න මොණරතැන්න කියලා.. ඒ වුනාට ගොඩක් අය දන්නේ නෑනේ.. මට ගියපාර කියන්න බැරි වුනා.. මේ "මොණරතැන්න" කියන ගම තියෙන්නේ වැලිකන්ද පහුකරලා යනකොට.. පොඩි ගමක්.. පොලොන්නරුව-මඩකලපුව ප්‍රධාන පාරේ යනකොට ලොකු බෝඩ් එකක් ගහලා තියෙනවා හැරෙන්න.. ඔන්න ඒ පැත්තේ ගියපු වෙලාවක බලන්න මතක් කරලා.. ඔන්න ඉතින් මං යන්න කලින් දවස් වල ඒ පැත්තට බරටම වැහැලා... වතුර ටික ටික බැහැගෙන යනවා.. වාකරේ හන්දියට යනකං පාර අති විශිෂ්ඨයි... එතනිං එහාට තමයි ප්‍රශ්ණේ.. පොලොන්නරුවේ ඉඳන් වාකරේ හන්දියට තියෙන කිලෝ මීටර් 68ත් හරි එතන ඉඳං මඩකලපුව ටවුන් එකට තියෙන කිලෝ මීටර් 39ත් හරි.. හැබැයි ඉක්මන්ටම ඒ ටිකත් හදයි.. මේ හිටපු දවස් තුනේම මගේ ප්‍රියතම කෑමක් වන ඉස්සෝ හැම වේලටම කන්න ලැබුනා.. අපේ බොස් පවා දන්නවා මං සී ෆුඩ්ස් වලට ආසයි කියලා.. ඉස්සෝ දැල්ලෝ කකුළුවෝ තමයි ඉතිං ! ගියපාර නැගෙනහිර ගියපු වෙලාවේ දාපු බ්ලොග් ලිපියේ මේවා කියන්න බැරි වුනානේ..

අම්පාර දිස්ත්‍රික්කය පැත්තටත් පොඩ්ඩක් විතර ගියා.. කල්මුනේ, අක්කරෛපත්තු පාරේ ඔළුවිල් නගරය හරියට යනකම් විතර ගියා.. ලස්සනේ බෑ පාර දෙපැත්තේ ඔක්කොම කුඹුරු වගා කරලා.. පේන තෙක් මානෙට බණ්ඩි ගොයම.. කොළම කොළ පාටයි... හරිම සරුවට හැදිලා.. අවුරුදු ගාණකින් තමයි මේ වගා කරන්න පටන් අරං තියෙන්නේ.. යුද්දේ ඉවර වුනාට පස්සේ මහපොළවටත් පණ ඇවිල්ලා වගේ පේන්නේ...






නැගෙනහිර වැඩ ටික ඉවර කරලා ආපහු ගෙදර එන්න එද්දී මාර වැඩක් වුනා.. මනම්පිටිය පාර යට වෙලා.. පරාක්‍රම සමුද්‍රය වාන් දාන්න පටන් අරං.. කිලෝ මීටරයක් විතර දුරට අඩියක් දෙකක් විතර වතුරෙන් යට වෙලා ගහගෙන යනවා වේගෙන්.. පාරත් බ්ලොක් වෙලා.. සමහර වාහන වලට යන්නත් බෑ.. අපේ වාහනේ දිය ‍ගොඩ දෙකේම හොඳින් වැඩ කියලා මේ පාරත් පෙන්නුවා ඒ වතුර පාර දෙබෑ කරන් ගියාට පස්සේ... මං නං ‍ටිකක් විතර බය වුනා ඒ වෙලාවේ... ඒ එන මගදී පොළොන්නරුවෙන් වැව් කරවල දුමේ වේලපුවාත් ගත්තා.. මාර රහයි.. හැබැයි ටිකක් විතර ගනං..

ඔන්න ඉතින් නැගෙනහිර රාජකාරී ටික ඉවර කරලා ආපහු ගෙදර ආවේ 28 වෙනිදා රෑ.. තව විස්තර ඊළඟ ලිපියට දාන්නම් හො‍ඳේ..

Tuesday, December 29, 2009

ඒ මහා පාවාදීමෙන් පසු...


හැමෝම ඉතින් දන්නවානේ ලේක් හවුස් පත්තර මහගෙදර දැන් අරලියගහ මන්දිරේ වගේ වෙලා කියලා.. විශේෂාංග ලිපි වලත් දේශපාලනේ.. රසඳුනෙත් දේශපාලනේ.. වෙළඳ දැන්වීමුත් දේශපාලනේ.. තව ටික දවසකින් මංගල දැන්වීමුත් දේසපාලනේ වෙයිද මන්දා...

මම මේ ඊයේ පෙරේදා මඩකලපු ගියපු ගමන් පත්තර ඔක්කෝම ටික කියව කියව ගියා.. සිළුමිණේ කියෙව්වේ මේ ලිපිය විතරයි.. කෝක කොහොම වුනත් කසුරි මාමා මේ ලිපිය ලස්සනට ලියලා තිබුනා.. ඔබත් කියවා බලන සේක්වා... “සත්‍යය මේව ජයතේ”...

උපුටා ගැනීම - සිළුමිණ - 2009/12/27


ඒ මහා පාවාදීමෙන් පසු...
ඒ මහා පාවාදීමෙන් පසු සතුරෝ ජේසුස් වහන්සේ කුදලා අල්ලා ගත්හ. රෙදි කඩක් පමණක් ඉතිරිකොට වස්ත්‍ර ඉවත් කළහ. කටු ඔටුන්නක් හිස මත තැබූහ. කුරුසියක් උරමත තැබූහ. කස පහර දුන්හ. පරිභව කළහ.

කුරුසියේ බර ද කස පහර ද ඉවසා ගත නොහැකිව ජේසුස් වහන්සේ බිම ඇද වැටුණේය. කුරුසියත් ඔසවාගෙන නැඟී සිටින තුරු උන් කස පහර දුන්හ.

කටු ඔටුන්නෙන් සිදුරු වූ නළල් තලයෙන් ගලන ලේ දෙකම්මුල් තෙමමින් ගලා ගියේ ය. කස පහර නිසා පුපුරා ගිය පිට පෙදෙසින් ගලන ලේ දහරා රෙදි කඩ ද ලේ පැහැ ගන්වමින් පහළට ගලා හැලුණේ් ය. පිරිමින් ගේ දෝෂ කඳට උරදුන් පව්කාර ස්ත්‍රිය වතුර බිඳක් ගෙන ඉදිරියට පැමිණියා ය. තමන් වෙනුවෙන් කල්වාරි කන්ද නඟින දේව දූතයා දෙස මිනිස්සු බලා සිටියහ.

ඔවුන්ගේ සුසුම්වලින් කල්වාරි කන්ද චලනය වීය. ඔවුන්ගේ විලාප හඬින් කඳු මුදුන දෙදරා ගියේ ය. සතා සීපාවෝ බලා සිටියහ.

අවසාන භෝජන සංග්‍රහයේ දී ජේසුස් වහන්සේ පාවාදුන් ජුදාස්ට රිදී තිහක් ලැබුණේ ය.

රිදී තිහකට මේ පාපතරයා විසින් දේවත්වය යක්ෂයින්ට පාවා දුන්නේ ය. මනුෂ්‍යත්වය මෘගයින්ට පාවා දුන්නේ ය. මානව දයාව තිරිසනුන්ට පාවා දුන්නේ ය. පව් කාර ස්ත්‍රියට ගල් ගසන විට එකම වරදක් වත් නොකළ කෙනකු පළමු ගල ගසන්න යැයි පවසමින් පිරිමින් ගේ දෝෂ කඳට යට වී හපයක් වී ගිය ඒ අසරණ ස්ත්‍රිය ගලවාගත් කරුණාව, ජුදාස් නම් වූ පාවා දෙන්නා විසින් දුෂ්ටත්වයට පාවා දුන්නේ ය.

ස්වර්ගය, අපායට පාවා දුන්නේ ය. කෙම්බිම, වියලි වැලිකතරට පාවා දුන්නේ ය. පරවියා උකුස්සාට පාවා දුන්නේ ය. මුව පැටියා කොටියාට පාවා දුන්නේ ය. සා පැටියා වෘකයාට පාවා දුන්නේ ය. කුරුලු පිහාටුව, වලස් නියකට පාවා දුන්නේ ය. සඳ වතුර ලෝ දියට පාවා දුන්නේ ය. පිනි බිංදුව, ගිනි පුපුරට පාවා දුන්නේ ය. ජීවිතය මරණයට පාවා දුන්නේ ය.

එසේ ම අන්තිමේ දී ශවේන්ද්‍ර ද සිල්වා අන්තර් ජාතික ද්‍රෝහීන්ට පාවා දුන්නේ ය. 58 වැනි සේනාංකය දුෂ්ට බලවේගවලට පාවා දුන්නේ ය. ගෝඨාභය රාජපක්ෂ කුමන්ත්‍රණකාරයින්ට පාවා දුන්නේ ය. ශ්‍රී ලංකාවේ ස්වාධිපත්‍යය අන්තර්ජාතික දුෂ්ටයින්ට පාවා දුන්නේ ය.

කීර්ති විජේබාහු, වළගම්බා, මහා පරාක්‍රමබාහු, දුටුගැමුණු ආදි නර විරුවන් විසින් ගොඩනඟන ලද ශ්‍රී ලාංකේය අභිමානය, අන්තර්ජාතික කැන හිලුන්ට පාවා දුන්නේ ය.

දැන් මේ කුමන්ත්‍රණකාරයෝ ගෝඨාභයගේ කරට කුරුසියක් තැබීමට සැලසුම් කරති. ඒ අපේ රට ත්‍රස්තවාදයෙන් බේරා ගැනීම සඳහා තම බුද්ධිය සහ ප්‍රඥාව යොදා ගනිමින් සියුම් ලෙස මානුෂික මෙහෙයුම සැලසුම් කිරීම පාපයක් වූ නිසාවත් ද?

ශවේන්ද්‍ර ද සිල්වා ගේ කර මතට ද කුරුසියක් පැටවීමට සැලසුම් කරති. ඒ මන්නාරමේ සිට නන්දිකඩාල් කලපුව තෙක් ගමන් කරමින් සටන් බිම පෙරමුණේ සිට සියල්ල මෙහෙයවමින් අනේක දුක් පීඩා විඳිමින් කලපුව කොටු කර ප්‍රභාකරන් නම් වූ ගොරතර පාපතරයා විනාශ කොට අපේ රට බේරා ගැනීම ශාපයක් වූ නිසා වත් ද?

කෑමක් බීමක් නොමැති ව.. වතුර පොදක්වත් නොමැතිව.. දින ගණන් සති ගණන් කටු කොහොල් මැදින් වැස්සට තෙත් බරි වෙමින් අව් කාෂ්ටයට පිළිස්සෙමින්... බූට් සපත්තු තුළ සිරවී ඇති ඇඟිලි තැලී පොඩි වී කුණුවෙන තුරු ඇවිදිමින්... අත් පා අහිමි කරගනිමින් රට වෙනුවෙන් ඇස් ඉස් මස් ලේ පූජා කරමින්... දරුවන්, මවුපියන්, පෙම්වතියන් අහිමි කර ගනිමින්..., සටන් බිම වෙඩි කා... ජීවිතය ම රටට දෙමින්... මන්නාරමේ සිට නන්දිකඩාල් කලපුව තෙක් පැමිණි 58 වැනි සේනාංකය රණවිරුවන්ගේ කර මතට කුරුසියක බර වැටුණේ ප්‍රභාකරන් ඇතුළු ත්‍රස්තවාදී හැතිකරය විනශ කිරීම පාපයක් සහ ශාපයක් වූ නිසාවත් ද?

අපේ රට වෙනුවෙන්... අපේ රටේ ස්වාධිපත්‍යය වෙනුවෙන්... අපේ රටේ අනන්‍යතාව වෙනුවෙන්... අභිමානය වෙනුවෙන්... කොටින් ම අපේ රටේ අහිංසක මිනිසුන් වෙනුවෙන් ඉදිරිපත් වීම නිසා කුරුසියත් කර තබාගෙන අන්තර්ජාතික යුද අපරාධ අධිකරණය වෙත කස පහර කමින් අවලාද අපහාස විඳිමින් ඔවුන්ට ගමන් කරන්නට සිදු වුවහොත් ඔබ කුමක් කරන්නෙහිද? ජනතාවෙනි! ඔබේ හෘදය සාක්ෂියට තට්ටු කරන්න. ඔබේ ආත්මය ස්පර්ශ කරන්න. ඔබේ සංවේදී හදවත මත සිත තබන්න.

“මේ රණවිරුවන් වෙනුවෙන් පෙනී සිටින්න. ඔවුහු ඔබේ ගැලවුම්කාරයෝ ය. ගැලවුම් කාරයන් සහ දුෂ්ටයින් හදුනා ගන්න. එවිට සත්‍යය ජය ගනු ඇත.”

ඔබේ හෘදය සාක්ෂිය, ඔබේ හදවත පමණක් නොව ඔබේ මුළු ආත්මයම ඔබට පවසනු ඇත.

“සත්‍යය ජයගනු ඇත.”

“සත්‍යය මේව ජයතේ”

සටහන - කසුරි


උපුටා ගැනීම - සිළුමිණ - 2009/12/27

Tuesday, December 1, 2009

කල්කටා නුවරට ගිය ගමනක්...


ඔන්න කාලෙකින් ටිකක් දිග බ්ලොග් ලිපියක් ලියන්න යන්නේ... පහුගිය ටිකේ කණ ගාවට වැඩ ගොඩ ගැහිලා තිබුන නිසා හරි හමන් යමක් ලියා ගන්න බැරිවුනා.. තාමත් ඉතින් එහෙම තමයි.. අනේ මන්දා මගේ වැඩ කවදා ඉවර වෙයිද දන්නෙ නෑ.. මං මැරෙන දවසක තමයි ඉතින්..

මේ මාසේ මුළ මට ඉන්දියාවේ යන්න සිද්ධ වුනා රාජකාරී වැඩ කීපයකට... මේ මං ඉන්දියාවට ගියපු දෙවනි වතාව... මගේ ටුයිටරේයි මූණුපොතෙයි යාළුවො නම් දන්නවා ඉතින් ඒ ගැන... මුල්ම දවස් කීපයේ අපි හිටපු හෝටලයෙන් එළියට බැහැගන්න බැරි තරමට වැඩ තිබුනා... පියර්ලස් ඉන් කියන හෝටලේ දහ වෙනි තට්ටුවේ තමයි කාමරේ තිබ්බේ.. ඔන්න ඔය පල්ලෙහායින් තියෙන්නේ ඒ කාමරේ ජනේලේ ඉඳලා ගත්ත ෆොටෝ එකක්... ඉතින් නොවැම්බර් 9 වෙනිදා තමයි වැඩ වලින් නිදහස් වුනේ... ඊටපස්සේ දවස් කීපය ගත කලේ ම‍ගේ යාළුවෙකුගේ ගෙදරක... ඒ කල්කටා ටවුන් එකේ බාග්බසාර් කියන හරියේ... ඒක තට්ටු නිවාසයක්... ඊට එහා පැත්තේ තිබුනේ සුවිශාල ගංගා නදිය.. ටිකක් කාර්යබහුල පැත්තක් වුනාට හිතට ඇල්ලුවා...




හරිය‍ටම කිව්වොත් මං ගියේ ඉන්දි‍යාවේ බටහිර බෙංගාලය කියන ප්‍රාන්තයට... කවුරුත් දන්නවා හැබැයි කල්කටා කිව්වාම නම්... ෂාරුක් ඛාන්ලා රාණි මුඛර්ජිලාගේ උපන් ගම් එහෙනේ... දැනට මාස කීපයකට කලින් ‍මේ ප්‍රාන්තයට එහා පැත්තෙ තියෙන රටටත් මට යන්න අවස්ථාවක් ලැබුනා.. ඒ බංගලාදේශය.. ඉස්සර, ඒ කිව්වේ 1947 අගෝස්තු වල තමයි ඉන්දියාවයි පාකිස්ථානයයි නිදහස් රටවල් දෙකක් බවට පත්‍වුනේ.. ඒත් ඒ වෙනකොට බංගලාදේශය කියලා වෙනම නිදහස් රටක් තිබ්ලා නෑ.. බංගලාදේශයට එදා කියලා තියෙන්නේ නැගෙනහිර පාකිස්ථානය කියලා.. 1971 දෙසැම්බර් 16 වෙනිදා තමයි බංගලාදේශය නිදහස් රටක් විදිහට වෙන්වෙලා තියෙන්නේ.. ඉතින් බංගලාදේශයයි ඉන්දියාවයි වෙන්වෙන්නේ බටහිර බෙංගාලය කියන ප්‍රාන්තයෙන්.. මේ ප්‍රාන්තයේ අගනුවර තමයි කල්කටාව කියන්නේ.. ඇත්තටම කල්කටාව කියන්නේ ඉංග්‍රීසි පාලන සමයේ ඒ කියන්නේ 1947ට පෙර තිබුනු බ්‍රිතාන්‍ය ඉන්දියාවේ ප්‍රධානතම බලකොටුව... ගංගා නදිය මුහුදට එකතුවෙන්නෙත් මෙන්න මේ කල්කටා නුවරින්... කල්කටා වල තියෙනවා වික්ටෝරියා අනුස්මරණ ශාලාව කියලා එකක්.. ඒක ටිකක් විතර ට‍ජ්මහල් වගේ.. එන්ගලන්තේ වික්ටෝරියා රැජිණ අනුස්මරණයට 1906 දී රැජිණගේ මුණුපුරා වන වේල්ස් කුමාරයා විසින් තමයි මේ අනුස්මරණ ශාලාව හදන්න මුල්ගල තියලා තියෙන්නේ.. 1921 දී තමයි මහජනතාවට විවෘත කරලා තියෙන්නේ කොහොමහරි.. හරිම ලස්සන තැනක්... ඔන්න පල්ලෙහා තියෙනවා ෆොටෝ ටිකක් බලන්න... කල්කටාවට ගියොත් වික්ටෝරියා අනුස්මරණ ශාලාව බලන්නත් අමතක කරන්න එපා ඔන්න...




ඊළඟ දවසේ අපි ගියා කල්කටා කටුගෙයට... අපේ කටුගේ හැඩයම තමයි... ඒ වුනාට ටවුන් එක මැද තියෙන නිසා ටිකක් කලබලකාරී... මේකේ ඇතුලේ ෆොටෝ ගන්න දෙන්නේ නෑ.. ඒ වුනාට මං ෆෝටෝ කීපයක් ගත්තා... :) මං දැක්ක විශේෂතම දේ තමයි ඇත්ත ඊජිප්තු මමියක් බලාගන්න පුළුවන් වෙච්ච එක.. ඒත් ෆෝටෝ එකක් නම් ගන්න බැරිවුනා...




එදාම අපි ගියා කල්කටා වල තියෙන ග්‍රහලෝකාගාරයට.. මං ලංකාවේ එකටවත් තාම ගිහිල්ලා නෑ.. (ලැජ්ජාවේ බෑ) ඒ වුනාට වෙලාවට මේ ග්‍රහලෝකාගාරය බලාගන්න ලැබුනා... හින්දි බෙංගාලි ඉංග්‍රිසී භාෂා වලින් දර්ශණ වාර පවත්වනවා... අපි ගියපු වෙලාවේ වාසනාවට වගේ ඉංග්‍රීසි දර්ශණය තිබ්බේ... මේ ග්‍රහලෝකාගාරය ආසියාවේ විශාලතම ග්‍රහලෝකාගාරය කියලා විස්තර දැනගන්න ලැබුනා... මෙන්න මෙතනින් එම්. පී. බිර්ලා ග්‍රහලෝකාගාරය ගැන වැඩි විස්තර බලාගන්න පුළුවන්...


මේ තියෙන්නේ එම්. පී. බිර්ලා ග්‍රහලෝකාගාරය

ආහ් මට කියන්න අමතක වුනා... අපි මුල් දවස් කීපය හිටපු හෝටලය තියෙන්නේ කල්කටා වල සුප්‍රසිද්ධ ක්‍රිකට් ක්‍රීඩාංගනයක් වන ඊඩන් ගාඩ්න් ආසන්නයේ.. මං දවසක් රෑ කෑමට හෝටලේ භෝජනාගාරයට යද්දී දැකල පුරුදු කෙනෙක් මුණ ගැහුණා... ඒ ඉන්දියා ක්‍රිකට් කණ්ඩායමේ ඊර්ෆාන් පතන්... එයාගේ අයියා යූසුෆ් පතනුත් මං එන්න ටිකකට කලින් ඇවිත් තියෙනවා... ඊර්ෆාන්ගේ නංගියි පෙම්වතියයි එක්ක තමයි ඇවිත් හිටියේ.. මං ටිකක් වෙලා කථා කරලා අතේ තිබ්බ ෆොන් එකෙන් ෆොටෝ එකකුත් ගත්තා... කියන්න බලන්න කවුද වැඩියෙන්ම ගති කියලා.. ? :)


අර ඈතින් ‍කණු 4ක් පේන්නේ ඊඩ්න් ගාඩ්න් (Eden Garden) ක්‍රීඩා පිටිය...



කවුද handsome ? :D


ඔන්න අවසාන දවස් කීපයේ ටිකක් නගරයෙන් ඈතට යන්න හිතුවා.. ‍ගොඩක් අය දන්න කියන රබින්ද්‍රනාත් තාගෝර් මැතිතුමාගේ ශාන්ති නිකේතන් වලට තමයි ඊළඟට ගියේ... කලින් ඉඳලා සැලසුම් කරගෙන හිටිපු නිසා දවස් දෙකක් ඉන්න බලාගෙන ගියා... මගේ යාළු මිතුරිය ශාන්ති නිකේතන් අවටින් නිස්කලංක නවාතැනකුත් කථාකරලා තිබුන නිසා ලේසි වුනා... කල්කටා නගරයේ ඉඳලා කිලෝ මීටර් 250ක් විතර ඈතින් තියෙන බෝල්පූ‍ර් කියන ප්‍රදේශයේ තමයි ශාන්ති ‍නිකේතන් පිහිටලා තියෙන්නේ... ‍හැමෝම දන්නවා ඇති නේද ශාන්ති නිකේතන් කියන්නේ එක්තරා විදිහක විශ්ව විද්‍යාලයක් කියලා... සාහිත්‍ය කලා විශයන් වලට තමයි මේ විශ්ව විද්‍යාලය ප්‍රසිද්ධ... රබින්ද්‍රනාත් තාගෝර් තුමා 1913 දී තමයි මේක විශ්ව විද්‍යාලයක් විදිහට පටන් අරන් තියෙන්නේ.. ඉන්දිරා ගාන්ධී, සත්‍යජිත් රායි වගේ දැවන්තයින් මේ සරසවියෙන් තමයි ඉගෙනුම ලබලා තියෙන්නේ... දැනටත් රටවල් ගණනාවකින් ආපු සිසු සිසුවියෝ මෙහෙ අධ්‍යාපනය ලබනවා..


ශාන්ති නිකේතන් සරසවියට ඇතුළුවීම...



රබින්ද්‍රනාත් තාගෝර් මැතුතුමාගේ පිළිරුවක්...



ශාන්ති නිකේතන් සරසවියේ පැරණි ගොඩනැගිලි



ශාන්ති ‍නිකේතන් ප්‍රධාන ගොඩනැගිල්ල ඉදිරිපිට...


සරසවි භූමියේ ඇති කලා නිර්මාණයක්...


ශාන්ති නිකේතන් සරසවියේ පැරණි ගොඩනැගිලි...

අපි ටිකක් මේ සරසවි භූමියේ ඇවිදිද්දී අපිට හම්බුනා ගැමි ගී කිය කිය ඇවිදින මිනිස්සු දෙන්නෙක්.. කෙලින්ම සල්ලි ඉල්ලන්නේ නැතිව ගීත කියලා ජීවත්වෙන ශ්‍රම‍ණයෝ වගේ පිරිසක්... අමුතුම ලස්සනකුත් හරිම සමීප බවකුත් ඒ කියපු ගීත වලින් මට දැනුනා.. ටික ටික හවස් වෙලා කළුවර වැටෙනකම්ම අපි ශාන්ති නිකේතන් සරසවියේ ඇවිද්දා...


ගී කියන ශ්‍රමණයන් දෙදෙනෙක්...

ඊළඟ දවසේ අපි ගියා ටිකක් ෂොපින් පාරක් දාන්න.. ඒ බෝල්පූර් ප්‍රදේශයේම හදන බඩු භාණ්ඩ කීපයක් මිළදී ගත්තා.. හරි ලස්සන බෑග් කීපයක්ම ගත්තා යාළුවොන්ට බෙදන්න... දැන්නම් ඉලන්න එපා ඔන්න... :) ඒවායේ කෑලිත් නෑ දැන්... ආහ් මෙතනදිත් අර වගේ සින්දු කියන ශ්‍රමණයෝ හමුවුනා... ගීත 3ක් 4ක් අපි ඇහුවා.. ග්‍රාමීය බෙංගාලි භාෂාවෙන් තමයි මේ ගී පද ගැයුනේ.. ඒ ගීතත් අහලා අපි ආයෙත් කල්කටා වලට යන්න පිටත් වුනා... හවස් වෙද්දී කල්කටා වලට ඇවිත් සංගීත භාණ්ඩ විකුණන පරණ කඩේකට ගියා.. එතනින් මගේ ඉන්දියානු මිතුරිය මට සංගීත භාණ්ඩයක් තෑග්ගක් විදිහට අරං දුන්නා.. පල්ලෙහා තියෙනවා ඒ ෆොටෝ එකත්... ඉතින් ඊළඟ දවසේ අපි ආපහු ගමරට බලා ආවා...


තවත් ගී කියන ශ්‍රමණයන් දෙදෙනෙක්...



මේ නම් ඉන්නේ ගී කියන ශ්‍රමණයෙක් නෙමෙයි ඔන්න.. :)



ගී කියන ශ්‍රමණයන් දෙදෙනෙක්...


සංගීත භාණ්ඩ සාප්පුවේදී...


ලැබුණු තෑග්ගක්...

කල්කටා වල ඉඳලා ලංකාවට ඍජු ගුවන් සේවා නැති හින්දා චෙන්නායි හරහා තමයි යන්න වුනේ.. චෙන්නායි වලත් ඉතින් පොඩ්ඩක් රවුම් ගැහුවා... කියන්න තරම් දෙයක් නෑ ඉතින්... ෂොපින් තමයි අතේ සතේ හි‍ඳෙනකම්... :)


කල්කටා නුවරට ඉහළින්...



වළාකුළු වලටත් උඩින්...
 

Udara's Blog || රජරට පුත‍්‍රයාගේ බ්ලොග් එක.. Blak Magik is Designed by productive dreams for smashing magazine Bloggerized by Ipiet © 2009